Fiskalnan ta pidi 40 aña di prizòn pa hóben ku a kometé aborto

399
E desishon di e wes lo bira konosí den oranan di awe mainta.

SAN SALVADOR – E fiskal general di El Salvador a pidi un total di 40 aña di prizòn pa e hóben Evelyn Hernandez, di 21 aña, kende in biaha mas ta den un huisio pa e delitu di homisidio, kua el a kometé despues di supuestamente kometé aborto. E kaso aki aparentemente ya e logra keda konkluí i su desishon lo bira konosí den oranan di awe.

E Ministerio Públiko di e pais ta akusá e hóben, kende su embaraso tabata produkto di un violashon, di homisidio grave. Pues e fiskal ta sostené ku e hóben tabata esun enkargá di protehá bida di e beibi i esaki no a evitá su morto, pa kua inisialmente a pidi 30 aña pero awor ta eksigí un kondena di 40 aña.

E aktivista Morena Herrera, di un asosiashon ku ta bringa apoyo hurídiko na Hernandez, a katalogá e petishon di e fiskalnan komo unu sumamente grave. Esaki a indiká ku e echo ku a pidi 40 aña ta situashon sumamente grave.

Esaki a sigui splika ku e fiskalnan a señalá durante tratamentu di kaso, ku e hóben a kometé un delitu di omishon pa motibu ku, segun nan, Evelyn mester a aktua komo garante di atenshon di e resien nasí i lo por a eksigí un komportashon diferente, pa kua awor ta pidi kastigu di 40 aña.

Herrera a señalá ku e Ministerio Públiko no ta konsiderando e kondishonnan di salú di e hóben mes, kende segun un di e abogadonan, a pèrdè konosementu pa un sangramentu eksesivo ku el a sufri despues di parto ekstrahospitalario ku e tabatin, loke a impedí ku e por a yuda e feto di kualke manera.

E aktivista ademas a indiká ku e wes mester analisá diferente pruebanan presentá i e elementonan suphetivo di e proseso.

Di su banda, Bertha de Leon, un di e abogadonan di Hernandez, a indiká na medionan di komunikashon ku e defensa ta satisfecho pa e trabou ku nan a realisá i tambe ku pruebanan ku nan a presentá.

Esaki a sigui indiká ku nan tin speransa den e kaso aki i ku awe e sentensia lo ta unu na fabor pa asina e hóben Evelyn por kontinuá ku un bida normal.

E huisio kontra Hernandez a keda realisá despues ku korte supremo di hustisia a anulá na desèmber di aña 2018, un fayo emití pa e tribunal di sentensia di Cojuteque.

Den e fayo aki, emití na luna yüli di aña 2017, Hernandez, un muhé di ménos rekurso na e pais, a keda kondená na 30 aña di prizòn pa e delitu di homisidio grave.

E hóben, kende ta den libertat kondishonal, a sufri un parti ekstrahospitalario dia 6 di aprel di aña 2016 na momentu ku e tabata na su bibienda i despues a keda trasladá pa un miembro di su famia pa un sentro médiko, unda el a keda denunsiá na outoridatnan pa e dòkter ku a atendé.

E kaso di Evelyn a traspasá frontera salvadoreño i diferente organisashonnan internashonal di derechi humano na fabor di despenalisashon di aborto, a solisitá fiskalnan pa para ku akusashonnan kontra e hóben.

Na El Salvador, hende muhé nan ku sufri di komplikashonnan durante nan embaraso i ta okashoná abortonan spontáneo, ta sospechoso di a praktiká aborto, kua ta prohibí den tur sirkunstansia i ta keda tipifiká komo homisidio grave. Esaki tin un kastigu di 30 aña di prizòn.