FKP ta paga mas o ménos 2 mion pa aña na vigilansia

318
Willemstad,– Ayera parlamento di Kòrsou tabatin un reunion públiko kaminda ku e tema di e reunion tabata Fundashon Kas Popular (FKP) komo riesgo pa presupuesto 2018.

 

Durante di e reunion aki tabata presente minister di Finansa señor Kenneth Gijsbertha i tambe  minister di Tráfiko, Transporte i Planifikashon Urbano señora Zita Jesus Leito.

Durante di e reunion aki a bini dilanti ku Fundashon Kas Popular pa aña ta paga mas o ménos 2 mion florin pa bewaking.

Esaki ta enserá e kasnan ku bira bashí i tambe kasnan kaminda ku trabounan di mantenshon ta ser hasi. Segun FKP mester hasi esaki i sigur si ta den bario nan kaminda un i tur sa ku malechornan mesora ta kibra drenta den e kasnan i destruí esakinan.

FKP ta bisa ku tin bario ku si un kas bira bashí mainta i no pone bewaking, pa mèrdia mes ya e kas ta tur destruí.  Kisas tin hende ku lo haña e suma aki haltu, pero si no usa e fórmula aki, e gastunan pa drecha e kasnan sigur lo ta hopi mas tantu.