Golovkin vs Derevyanchenko dia 5 di òktober den Madison Square Garden

99
Golovkin (39-1-1, 35 KO’s) lo enfrentá Derevyanchenko (14-1-0, 10 KO’s) dia 5 di òktober.
NEW YORK – Finalmente e anunsio ofisial a keda publiká i e pelea entre e bòksdó kazaho Gennady “Triple G” Golovkin (39-1-1, 35 KO’s) i e ukraniano Sergiy “The Technician” Derevyanchenko (14-1-0, 10 KO’s), pa e faha di peso mediano di e Federashon Internashonal di Bokseo (FIB), lo tuma lugá  dia 5 di òktober próksimo den e famoso Madison Square Garden na New York.

Despues ku FIB a kita e faha di kampion for di e bòksdó  Saúl “Canelo” Álvarez, pa motibu ku esaki no a por a yega na un akuerdo pa enfrentá e bòksdó Derevyanchenko, nan a skùif nan rènken ofisial i a nombra Triple G komo rival di e bòksdó di Ukrania.

Algu kurioso di e situashon aki ta ku porfin Golovkin lo enfrentá Derevyanchenko, despues ku aña pasá e tambe a pèrdè su titulo pa motibu di no enfrentá e bòksdó ukraniano. Ayera e anunsio ofisial di e programa kompletu di dia 5 di òktober a keda presentá na prensa i lo ta e peleanan ku lo forma e totalidat durante e evento ku e pelea estelar Golovkin(37) vs Derevyanchenko(33).

Den kaso di un viktoria pa Golovkin, lo e disponé di e título mundial ku lo eksihí un enfrentamentu ku “Canelo”, i e di tres pelea aki posiblemente lo por tuma lugá den luna di mei òf sèptèmber di 2020.