Guaidó a indiká ku un elekshon ku Maduro na poder nunka lo ta realmente liber

310
Segun Guaidó, tanten Maduro ta na mando nunka kosnan lo kana manera mester ta.

CARACAS – E kabesante di Parlamento di Venezuela, Juan Guaidó, rekonosé komo e presidente venezolano interino pa mas di sinkuenta pais, a indiká ku elekshonnan presidensial na e pais ku Nicolas Maduro na poder lo no ta elekshonnan realmente liber. Guaidó ta tacha Maduro di diktador i usurpador.

Esaki segun Guaidó a indiká durante un entrevista ku e kanal di CNN en Español.

Esaki a sigui indiká ku nan lo tin di pusha i hasi tur loke ku ta posibel pa tin un elekshon realmente liber, un transmishon ku kana segun institushonalisashonnan, un Konseho Elektoral nobo, bou di supervishon internashonal.

Den su opinion, no por tin un elekshon presidensial ku inhabilitashon òf partidonan klousurá.
E lider opositor a indiká ku kualke mekanismo ku por yuda na haña un solushon na e krísis polítiko na Venezuela ta pasa den e ‘preshon’ i tin di keda evaluá responsablemente pa ku tur e opshonnan pa por yega na un solushon.

Tambe a indiká ku den kaso ku e estadia di Maduro keda prolongá hopi, den e funshonnan ku e ta pretendé di ehersé, ta kore un rísiko ku lo tin un soporte na terorismo na Venezuela. Esaki tumando na kuenta, segun Guaidó, ku ya na e momentunan aki tin gruponan iregular ku ta sakando oro for di Venezuela pa asina finansiá nan aktividatnan iregular.

Venezuela ta pasando den un pik di tenshon polítiko for di luna si yanüari último, ora ku Maduro a hura un biaha mas un mandato di 6 aña. Esaki ta loke presisamente no ta keda aseptá i rekonosé pa oposishon i komunidat internashonal.