Ocho persona leshoná despues ku trein ta sali for di reil na Caracas

113
Dos di esnan heridá mester a keda trasladá pa sentro médiko den serkania.

CARACAS – Un total di ocho persona a resultá heridá den oranan di djasabra último. Esaki na momentu ku un trein di metro a sali for di reil na Caracas, segun un informe di outoridatnan polisial, kua tambe a indiká ku esnan afektá no a sufri heridanan di gravedat.

Seis di e personanan heridá a retirá for di e sitio ku nan propio medionan i e otro dos nan, di 38 i 49 aña di edat, mester a keda atendé pa paramédikonan na e sitio. Esaki nan posteriormente mester a keda trasladá pa un sentro médiko den serkania di e sitio di e insidente.

E suseso a sosodé na e stashon di Los Dos Caminos, na ost di Caracas, i a okashoná daño na e trein, segun por a nota riba fotonan ku ta sirkulá riba retnan di e pais.

E Metro di Caracas no a hasi referensia dirèkt na e insidente pero simplemente a indiká, via di Twitter, ku na Los Dos Caminos, tabatin un trein ku fayonan i ku pa e motibu aki lo no duna servisio na e parada ei i e próksimo kuater nan den serkania.

A informá tambe ku el a abilitá un ruta di kontingensia ku unidatnan di bùs pa asina por kubri e stashonnan ku no ta operativo pa e mesun motibu aki.

A agregá na final di esaki ku e personal di metro supteraneo ta trahando pa asina por intentá solushoná e problema ku tin ku e trein nan den fayo.

E Metro di Caracas, e via di transporte prinsipal na e kapital venezolano, a presentá den e último lunanan diferente fayo, motivá prinsipalmente na pèrdidanan di koriente, ku awendia ta sumamente komun rònt e pais mei mei di e krísis eléktriko.

Sinembargo, trahadónan di e supteraneo a denunsiá fayonan tambe ku ta relashoná ku falta di mantenementu ku e treinnan.

E wagòn i trapinan ta den un mal estado i e èrkonan tambe ta fayando ya pa añanan kaba.