Shofùr ku a dal mama i yu lagá den libertat

2514
WILLEMSTAD—Tabata ayera, despues di tabatin 2 siman den detenshon, ku a laga e sospechoso di e kaso di 2 morto den tráfiko liber.

Tabata kaso ku a tuma lugá na altura di Betesda na De Savaan, unda resientemente, un mama i su yu chikí a keda alkansá pa un vehíkulo, ku konsekuensia ku ámbos a bin pèrdè nan bida na e sitio mes, den oranan trempan di mainta.

Riba e fecha aki, tabata na e sitio mes, ku a hasi detenshon di e sospechoso, kende tabata shofùr di e vehíkulo. Investigashon den e kaso, a bin duna komo resultado ku e sospechoso tabata koriendo ku velosidat haltu i inkluso lo a pasa den lus kòrá na e sitio, unda e la bin alkansá e mama i su yu.

Ta trata di kaso ku fiskal Out tin e investigashonnan an su enkargo, miéntras ku e sospechoso ta kliente di abogadonan Martina i Snel.

Weskomisario ayera a opiná ku a base di e sirkunstansianan personal, kual na e momentunan aki, tin poko mas peso ku e investigashonnan den e kaso, ku ya parsialmente ta tras di lomba, ku e por ta den libertat, unda ku fiskal no tabatin problema ku esaki.

E sospechoso mes ta basta kibrá i sigur sufriendo pa ku su komportashon riba e fecha en kuestion, ku a kosta 2 bida. Sigur e ta lamentá e suseso enormemente, kual tambe a yuda pa ku su libertat temporal, pendiente pa e responsabilisá su mes den korte, na momentu ku hiba e tratamentu.