Haiti vs Kòrsou: “kara kara”

551

Brievengat—E “Granadiernan” di Haiti djasabra ta di bishita den stadion Ergilio Hato unda nan lo konfrontá e panternan di Kòrsou, “La Familia Azul”. E wega ta bálido pa e promé rònt di Nations League despues ku ámbos nashon a logra klasifiká pa e divishon máksimo dje liga. Otro siman 10 di sèptèmber un di dos wega lo hunga den e tèmpel di futbòl karibense, Sylvio Cator na Porta Au Prince, Haiti. Den 20 biaha ku nos a topa e Grenadiersnan, nos a gana nan solamente 1 biaha, tabla na 5 okashon i pèrdè 14. Vigilante awe ta analisá e dos ekiponan aki “kara pa kara i posishon pa posishon”. (skibí pa Lilo Sulvaran)

DEFENSA

Porteria: e porteria di Eloy Room (Columbus Crew/PSV) pa kompetensha di Nations League ta sólido. E ábil portero, ku un Tattoo di Pantera Negra riba su brasa, for di sèptèmber 2018 no a permití niun gol den Ergilio Hato, miéntras e selekshon nashonal ta di 10 gol na fabor 0 kontra te ainda. No tin niun duda ku e bendishon di defuntu Ergilio Hato ta riba Room i nos selekshon. Ganando di Grenada 10-0 i Guadeloupe 6-0, Room tin tur  motibu di sinti su mes trankil bou dje latanan di Ergilio Hato.

Haiti ta yega stadion Ergilio Hato ku kara na laira. Den dos enkuentro na Ergilio Hato (2008-2011) nan a gana nos tur dos biaha. Bou di lata nan ta bini ku e veterano Johny Placide kende alabes a hunga Kopa di Oro i hiba e Grenadiernan pa semi final dje kopa. Den último weganan di Haiti, e tabata sublime, ku viktoria riba Costa Rica (2-1) i Canada (3-2) miéntras e la logra tene e mònsternan di Concacaf Mexico na solamente un gol (0-1). E problema grandi di Placide ta ku n’e momentonan aki e ta fo’i ritmo debí ku e ta sin un kontrakt. Pero Placide tin tur eksperensha nesesario pa keda trankil ku 3 wega den Kopa Amérika 2016, 5 wega di Concacaf Gold Cup 2019 i 7 wega klasifikatorio pa Kopa Mundial di 2015 te ku 2017.

 

Eloy ta limpi den Ergilio Hato ku 10 na fabor – 0 kontra
Placide di Haiti
Johny Placide a pèrdè kontrakt na Oldham Athletic, e aktual ekipo di Gevaro Nepomuceno

Lateral Règts:  Kòrsou i Haiti ta konfrontá mesun problema den defensa. Dos pion prinsipal den ámbos selekshon ta leshoná.  Ta trata di Cuco Martina (Everton) pa Kòrsou i Charles Arcus di Haiti (AJ Auxerre). Apesar di esaki, ámbos ekipo ta bon representá den defensa. Riba règts na posishon 2, Kòrsou tin e hóben talento Jurien Gaari (RKC Waalwijk). Gaari ta bini fo’i un karera resien den liga profeshonal di futbòl. Saliendo for di Kozakken Boys den amatùr Ulandes e yu di Kòrsou a logra un kontrakt ku RKC Waalwijk i promové tambe pa divishon di onor na Ulanda. Su desaroyo ta astronómiko durante último aña pa kual motibu direktor tékniko Remco Bicentini a dun’é tur e konfiansa pa hunga Kopa di Oro riba posishon 2.

Ku nan strea Charles Arcus leshoná riba règts, e Grenadiernan ta bini ku e hóben di 22 aña, Djimie Bend Alexis (FC Lori Vanadzor). Alexis a hunga te ku e aña aki na Haiti ku AS Capoise, pero ta logra firma un kontrakt ku e tim di Armenia, FC Lori ku ta hunga pa e provinsia di Vanadzor. Direktor tékniko Marc Collat tin tur konfiansa den Alexis. Durante Kopa di Oro, Alexis a hunga sublime i hasta anotá e gol ku a duna e Grenadiernan viktoria riba Costa Rica 2-1. E ta un defensa lateral hopi rápido i ta konstante den atake, meskos ku su kolega na ala robes, Junior Christiaan.

Gaari a madurá fo’i dia e kla firma un kontrakt profeshonal ku RKC Waalwijk na Ulanda
Alexis ta un lateral règts ku hopi spit i ta rekuperá lihé fo’i su avansenan ofensivo. Riba e foto selebrando su gol di viktoria kontra di Costa Rica.

Sentralnan: miéntras Haiti tin un problema di luho den e posishonnan defensa sentral, Kòrsou tin un problema serio. Ku Cuco Martina leshoná, Remco mester bai buska profundo den pos pa solushoná e problema aki, kual kontra di Antigua a kosta nos un derota bergonsoso. Manera kosnan ta bayendo, Remco lo utilisá Darrel Lachman (Pec Zwolle) i Shermar Martina (MVV) den sentro defensa pa Kòrsou. Anke ámbos hungadó ta téknikamente na nivel, tin pregunta ta lanta riba nan velosidat. Na Antigua, un derota di 2-1, a mustra debilidat mei mei serka ámbos hungadó. Un opshon ku Remco por ta pensa na pone e talento di Roda JC, Roshon van Eijma. Van Eijma ta sorprendiendo den su sekshonnan di training na Kòrsou.

Haiti ta drenta Ergilio Hato mañan ku nan tres mihónan den sentro defensa komo opshon. Kestion tei bira ken direktor tékniko Collat tei skohe. Ku e veterano Kevin Lafrance (FC Apoel/Pafos) bek den selekshon, Collat tin hopi karta pa tira blòf. La France, kende ta yega Ergilio Hato pa di dos biaha, na e momentonan aki ta unu dje mihónan sino e mihó defensa sentral di Karibe. E tin un kantidat di 32 presentashon na nivel di selekshon. Na Kopa di Oro, Lafrance tabata leshoná i Collat a uza e hóben Jems Geffrard (FC Tulsa) huntu ku Andrew Jean Baptiste, kende ta sin kontrakt n’e momentunan aki. Geffrard a resultá den unu dje mihó defensanan durante Kopa di Oro 2019 na Estádos Unídos. Na un altura di 1.94 meter, Geffrard ta un muraya pa kalke liña atakante.

Lachman (4)
Shermar Martina lo trata na tapa e buraku ku Cuco Martina tabata yena den sentro defensa. Riba e foto ku nr. 15 selebrando durante Kopa di Oro.
Despues di Cuco Martina, kende ta leshoná, e haitiano Lafrance kisas ta e mihó den Karibe

.Lateral robes: Kòrsou a bini ta konfrontando hopi problema den defensa i n’e momentunan aki esun di mas grandi pa Bicentini tei bira “ken ta salí riba ala robes den defensa”. Tin diferente nòmber ku por wòrdu menshoná, pero esun mas probabel por bira Gevaro Nepumuceno (Oldham Athletic) . E ábil bolante ofensivo por hunga tambe riba lateral defensa i ta dominá ámbos pia. Durante Kopa di Oro, Ayrton Statie a yena e buraku aki huntu ku Jurick Carolina, pero ámbos hungadó ta ousente kontra di Haiti, Cheese Carmelia tambe kisas lo ta hungadó den Remco su mente. Un desishon ferfelu pa Kòrsou.

Miéntras Kòrsou i Remco ta luchando pa haña un kontesta ken tei defendé na ala robes, e Grenadiernan ta super sólido riba e posishon. Alex Junior Christiaan (FC Araraat Armenia) ta konta entre e mihó lateralnan den Karibe. Junior Christiaan ta bini fo’i e torneo Kopa di Oro ku prestashon sublime. Den Ergilio Hato mañan lo e no hasi diferensha den su estilo di futbòl, alegre i hopi ofensivo. Un lateral natural ku ta dominante riba su pia robes.

Gevaro tin sufisiente talento pa yuda riba lateral robes.
Alexi Junior ta un pèrla pa mira ku su futbòl ofensivo.

BOLANTE

Mientras den defensa Haiti tin mihó kadans ta toka, den medio kampo e dansflur ta kambia. Kòrsou ta simplemente sólido tantu riba papel komo riba tereno. E Grenadiernan no tin niun chèns ku nos mei mei di tereno, anke nan ta keda un trabuko. Kestion ta bira si Bicentini ta sigui mantené e sistema di 4-2-3-1 òf e ta kambia pa 4-4-2. Debut di Juninho Bacuna (Huddersfield) ta trese alegria pero alabes problema di kordinashon pa Bicentini. E 4 klavenan sin mas den bolante pa Kòrsou lo ta Juninho i Leandro Bacuna (Cardiff City), Brandley Kuwas (Al Nasr Dubai/Heracles) i Roly Bonevacia (Ail Faisaly). E siguiente opshon, dependé kua sistema Remco hunga, lo ta Sontje Hooi (ADO Den Haag), kende wikènt tras di lomba a hunga den e onsena básiko di ADO. Ademas Hooi a duna te ainda impreshon di ta serio den kondishon durante último 2 seshon di entrenamentu na Ergilio Hato. Jeremy de Nooijer, (Al Shamal) tambe lo fit den e sistema di Bicentini den number 6 komo bolante defensivo.

E kreolnan di Haiti, tambe no ta fásil den liña bolante, anke riba papel Kòrsou tin muchu mas kalidat. Nan ta laga na kas diferente as manera e.o. Fredlin Mompremier (FC Roughnecks), Sony Norde (Premyer Liqasi), Donald Guerier (sin ekipo) i Soni Mustivar (Neftci PFK) kende tambe ta leshoná. Pero na mesun momento DT Collat a trese mesun liña di bolante ku a hiba nan na éksito durante Kopa di Oro. Collat ta varia su sistema di wega kada biaha pero ta sali mayoria biaha ku dos bolante defensivo. E hungadó lokal nase na Merka Stevan Saba (AC Viollete) huntu ku Bryan Alceus (FC Paris) nasé na Fransha ta e dos basikonan di Collat. Nan dos no ta duna espasio riba tereno. Dos motor, dos trahadó duru ku Collat no ta laga kai pa nada di mundu! Ront di Saba i Alceus. Haiti ta drai ku bolantenan ofensivo. Kontra di Kòrsou por spera sali riba tereno, Herve Bazile den 10, flanki’a pa Derrick Etienne(FC Cincinati?New York Bulls) i e bolante mas peligroso ofensivo di Karibe, e mònster….Duckens Nazon (Sint Truiden).

Juninho ta e atkishon nobo di selekshon
E temibel Nazon, ta disfruta semper den selekshon di Haiti

DELANTERO

Den liña ofensivo, tantu Kòrsou komo Haiti tin tendensha di preferá hunga ku un sentro delantero. Kòrsou lo mester skohe entre Jafar Arias (Emmen)i Rangelo Janga (FC Astana) of Nigel Robertha (PFC Levski Sofia). E desishon no ta unu fásil pa Bicentini. E problema ta e sentro defensa di Haiti, Jems Geffrard kende ta 1.94 meter. Tur kos lo dependé e táktika ku Remco skohe. Esaki lo tin konsekuensha tambe riba eskoho di su sentro delantero.

Pa Haiti e desishon ta unu mas fásil. Tur kos ta drai rònt di nan safiro, Frantzdy Pierrot ku a kaba di firma ku e ekipo di liga 2 na fransha Guingamp. Pierrot no a impreshoná durante Kopa di Oro.

 

Robertha ta forma parti di tres alternativa ku Remco por skohe huntu ku Janga i Arias.