21 di sèptèmber Ramsey Silie ta hasi su entrada ofisial den XD

67
Por fin nan dos lo bai ta huntu den Classic XD.

WILLEMSTAD,—-Poko, poko pero sigur e fecha ofisial di e debut di e Keyboardman kompositor areglista Ramsey Silie den Classic XD ta aserkando. Di informashon ku a yega na mesa di redakshon di ‘E Mulina’, ta bisa ku dia 21 di sèptèmber Ramsey Silie lo hasi su debut den Classic XD.

Tambe ‘E Mulina’, a keda pone na altura ku lo bai tin hinter un espektákulo hinka den otro. Mas aleu ‘E Mulina’, a komprendé ku dia 21 di sèptèmber tur kantante ku a yega di kanta un piesa di Ramsey Silie lo bai ta presente, i nan lo bai kanta e piesa nan tambe.

Esaki ta nifiká ku fanátiko nan di tantu Ramsey Silie i tambe fanátiko nan di agrupashon musikal Classic XD mester tei na bòshi djasabra dia 21 di sèptèmber, paso sigur esaki lo bai bira un debut ku lo bai marka historia den nos farándula i den ámbito di Kòmbèk.

Tambe mester bisa ku e aña aki e agrupashon musikal Classic XD a bin ta hasi un tremendo trabou den nos farándula, i asta ‘E Mulina’, tin informashon ku pa 2020 ya e banda tin 44 fecha di prek den nan agènda, i ainda tin mas fecha ku un ora pa otro lo bai keda sera pa promotor. Esaki ta mustra ku promotor nan a kuminsá kere den e produkto musikal ku músikonan di agrupashon musikal ta tresiendo dilanti den ámbito di Kòmbèk. Kòrda ku djasabra dia 21 di sèptèmber Ramsey Silie lo bai hasi su debut ofisial den agrupashon musikal Classic XD.