Dòbel kantidat di insidentenan ku arma den Amsterdam

114
ya den mitar di 2019 tabatin 75 kaso
AMSTERDAM—E kantidat di insidentenan ku arma kandela den Amsterdam a subi dòbel den último 3 aña.

Si den 2017 a registrá 37 insidente ku arma kandela den Amsterdam, ya den mitar di 2019 tabatin 75 kaso. Esaki segun sifranan di reshèrshi di Amsterdam. Prinsipalmente e kantidat di asesinatonan a oumentá. Den 2017 tabatin 5 asesinato, e aña aki ya a registrá 15 asesinato. Si tabatin menos likidashon. Den 2015/16 tabata likidá 11 persona pa aña, awor tin 7. E kantidat di tiroteonan riba establesimentunan den horeka, kasnan i edifisionan komersial a oumentá. Esakinan a bira dòbel. E kantidat di menasa ku eksplosivo a subi di 6 den 2017 pa 15 den 2019. E kantidat di insidentenan ku arma di kandela ta vinkulá ku konfliktonan den ambiente di droga. mientras ku uso di droga ta oumentá, baho mundu ta gana mas plaka. I esaki ta kondusí na konfliktonan ku ta keda regla ku arma. Ta un problema grandi. Konseho munisipal di Amsterdam ta debatí riba e problema ku insidentenan di arma.