Minister kier frena kresementu studiantenan internashonal

68
minister kier wanta kantidat di studiantenan internashonal
DEN HAAG—Minister Van Engelshoven kier frena e kresementu di e kantidat di studiantenan di eksterior den Hulanda.

Segun e minister awor tin demasiado studiante internashonal. E minister kier pone den lei ku universidatnan i skolnan avansá mester por demostrá ku enseñansa den otro idioma ku no ta hulandes tin un balor agregá. E minister ta rekonosé ku e kresementu di skolnan na ingles i studiantenan internashonal por tin un efekto negativo pa dominio di idioma hulandes di studiantenan. Komo minister di Kultura e ta haña konosementu di e idioma hulandes imperativo. Van Engelshoven ta yama internashonalisashon di enseñansa avansá importante pero mester di mas balanse. Pasobra segun e minister e sistema no por ku e fluho grandi di studiantenan internashonal i esaki por pone finansiamentu i aksesibilidat di enseñansa avansá pa studiantenan hulandes bou di preshon. Tambe mester pone den lei ku institutonan den enseñansa mester duna studiantenan internashonal e oportunidat pa traha riba konosementu di idioma hulandes. Mas aleu lo oumentá e plaka di atmishon ku studiantenan internashonal (inkluso esnan pafó di Union Oropeo, Noruega, Islandia òf Liechtenstein).