No Game a sali pa Hulanda pa nan presentá djasabra awor

69
Awe nan ta sali pa Hulanda, kaminda ku djasabra awor nan lo bai tin un presentashon.

WILLEMSTAD,—-Awe ta e dia ku agrupashon musikal No Game ta sali pa Hulanda, kaminda ku djasabra awor nan lo bai tin un presentashon den kombinashon ku agrupashon musikal Cache Royale i Tsean.

T’asina ku e banda despues di basta aña ta bai presentá ku e front mortal ku a dominá farándula di Kòrsou den nan tempu. Ta trata aki di e front forma pa e kuater kantante nan ku ta Brian Dekkers, Reinier “ReintjeRock” Lijfrock, Micheal Long i Richi Rich.

Tambe ta bin aserka ku ta e banda kompletu ta sali pa Hulanda riba e dia di awe. Di informashon ku ‘E Mulina’, a risibí direktamente for di Hulanda ta bisa ku tur pero tur karchi a kaba pa loke ta trata e presentashon di No Game riba e lugá.

Algun dia tras di lomba ‘E Mulina’, a anunsiá ku No Game lo bai ta na Aruba dia 28 di desèmber, pero tambe ‘E Mulina’, tin informashon ku e chèns ta hopi grandi ku No Game por ta na Hulanda den luna di desèmber pa un presentashon, pero e notisia aki si ‘E Mulina’, mester kaba di haña konfirmashon riba dje.