Tata ku a sekuestrá yu mester paga mama 10.000 euro pa dia

1154
kriatura Insiya ku a keda sekuestrá pa su tata for di 2016
DEN HAAG—E tata indio ku a laga sekuestrá e yu Insiya den 2016 na Hulanda, mester paga e mama 10.000 euro pa kada dia ku e tene e yu na India.

Asina Hof di Den Haag a determiná siman pasá. Hof a konfirmá e veredikto di korte den prome instansia di Den Haag di desmeber 2017, ku a husga ku Insiya mester regresá mas pronto posibel pa Hulanda. Segun Hof e tata Shezad Hemani no tabatin mag di bai ku e yu sin outorisashon di e mama. Awor Hof ta mara un multa na e veredikto mirando e gravedat di e kaso. Insiya a keda saka aprutamente for di su ambiente konfiabel segun Hof. Debí na e aktitut di e tata a kibra e kontakto ku e mama. E suma por subi te máksimo 1 mion euro. E tata, un empresario mionario na India mester paga for di momentu ku e risibí e veredikto, ku ta siman pasa. E yu a keda sekuestrá ku violensia 29 september 2016 for di kas di su wela na Amsterdam i hiba pa su tata. E tempu ei e tata tabata den un prosedura di divorsio largu ku e mama, Nadia Rashid. El a bai ku e yu India, kaminda ainda e ta biba. Esnan ku a sekuestrá e kriatura a haña te 4 aña kastigu den yüli último. OM ta persigui tambe e tata i un primu ku tabata envolví den e sekuestro. India ta ninga di ekstraditá Hemani. Diplomasia ta trahando pa haña e mucha bek, pero te ku awor ni diplomasia ni intervenshon di premier Rutte no a yuda, pasobra segun India no tin kaso di sekuestro.