Tiffany de Freitas Brás a wòrdu koroná komo Reina Hispanoamericana Curaçao 2019

611
WILLEMSTAD,–6 Sèptèmber 2019, Willemstad – Djabièrnè último, Tiffany de Freitas Brás, bou di guia di Modeling & Etiquette School by Ayanette a wòrdu koroná komo Reina Hispnoamericana Curaçao 2019

Tiffany no ta deskonosí den e mundu di beyesa aki na Kòrsou. Aña pasa Tiffany a logra e titulo di promé finalista den e sertámen máksimo di beyesa, Miss Curaçao 2018.

Despues di a wòrdu aserká dor di representante nan internashonal, Tiffany a aseptá e reto pa representá Kòrsou na Reina Hispanoamericana na Bolivia i bou di guia di Ayanette Statia un èx Miss Kòrsou ku amplio ekspetensiá den e mundu di beyesa lokal i internashonal a forma un tim di profeshonalnan i a kuminsá ku preparashonnan, manera entre otro lèsnan di pasarela, makiahe, kabei, kurpa, fotografiá i mas.

Den luna di sèptèmber lo intensifiká tur treinmentu pa asina Tiffany ta bon prepará pa representá su isla.

E sertámen di Reina Hispanoamericana lo tuma lugá na Bolivia, kuminsando 27 òktober i e gran final lo tuma lugá 9 di novèmber 2019

Pueblo di Kòrsou por sigui tur desaroyo pa medio di e páginanan social ofisial di Reina Hispanoamericana i tambe página social di Tiffany de Freitas Brás. Ta pidi tur hende pa “follow” i “like” e páginanan, pa asina keda na altura di tur desaroyo rondo di su partisipashon.

Un danki tambe ta bai na tur e spònsornan ku a hasi e partisipashon di Tiffany de Freitas Brás posibel.

Nos ta deseá Tiffany de Freitas Brás tur klase di éksito ku e reto nobo aki i siguí traha duru pa saka kara di Kòrsou den eksterior.