Bendedora di number atraká na Boka Samí

821
  • Willemstad— Polis mester a bai Boka Samí den oranan di anochi pa un atrako kometé riba un ofisina di number.

Tabata den oranan di anochi ku a dirigí un unidat Polisial pa un ofisina di number den e bario di Boka Samí pa un kaso di atrako arma. Na e sitio indiká a bin topa ku e dama bendedora ku tabata basta spanta. E dama a splika ku na momento ku e orario pa stòp di bende number a yega e la lanta i a sera e porta i bira e bòrchi ku ta indiká ku e kantor di number ainda ta habri. E la bai bek tras di e tonbank pa sinta warda esnan ku ta pasa tuma e tasnan di plaka. Dado momento un tipo kara tapa i ku arma den man a habri e porta i a drenta e ofisina di number.

E hòmber mester a apuntá e arma riba e dama pa asina mustr’é seriedat di e kaso poniendo preshon pa doño e tas di sèn. No a keda e dama bendedora nada mas di entrega e tipo e tas ku e sènnan den dje. Mesora e tipo ku e tas den su poder a kore sali for di e ofisina di number bai pèrdè den skuridat. Polis ku a presentá a hasi nan investigashon pa despues pidi presensia di e tim di atrako na e sitio pa nan por kontinuá ku e investigashon.