‘Bo por manipulá screenshot di kòmbersashon di Whatsapp’

138
Segun fiskal bo por manipulá screenshot di kombersashon.
WILLEMSTAD,—- Ministerio Públiko representá pa fiskal mr. Dennaoui tabatin un rekisitorio basta largu ayera, unda e fiskal a trese dilanti ku e kòmbersashonnan ku a trese dilanti den e kaso di e hòmber Jose D. no ta konfiabel.

A trese algun screenshot, esta kopia di kombersashon ku mama di e víktimanan den kaso di violashon lo tabatin ku su prima, unda den e kopia ta mira ku e mama lo a bisa su prima ku e ta bai hasi lo máksimo pa sera e sospechoso Jose. Riba e kopia por a mira ku mama di e menornan lo a bisa ku despues ku el a nota ku e sospechoso tabatin otro dama i na estado, e la disidí ku e ta bai laga deklarashon di su yu nan yud’é sera e hòmber Jose.

Di un manera òf otro e kòmbersashonnan aki lo a yega serka abogado di e sospechoso, unda a hinka esakinan den e ‘dossier’. Segun fiskal ku e kier pa laga investigá e kombersashonnan aki mas aleu mirando ku por manipulá screenshot di kòmbersashon fásilmente. E fiskal a bisa ku por mira esaki tambe na e sistema kon e kòmbersashon ta kana i ku tabatin basta fayo den gramátika.

Segun Ministerio Públiko ku un persona por hasi uzo di 2 telefòn i manipulá esaki, pa hasi komo si fuera ta un persona tabata papia un ke otro. Abogado di e sospechoso Jose a trese dilanti ku e no ta kere ku esaki por ta e kaso. E abogado a bisa ku si kier a manipulá e kòmbersashon lo mester tabatin telefòn di e mama di e víktimanan, ku ta esun ku lo mester tabatin e number ku ta paresé riba e Whatsapp.

E abogado a bisa ku e dama mes a deklará ku nunka e no a duna niun hende su telefòn. Mr. Prevo a trese dilanti ku esaki por konkluí ku ta imposibel ku e dama ku a trese e kombersashon a manipulá esaki. E fiskal a para ariba ku e meta prinsipal ku e dama tabatin ta pa e sospechoso rekobrá su libertat i ku pa esaki a manipulá un kòmbersashon pa asina logra nan meta.