Debe di Gobièrnu ta strobando Ministerio Públiko di hasi nan trabou

66
OM ta sali sufri konsekuensia pa debe di gobiernu.
WILLEMSTAD,—- Loke sigur a hala basta atenshon den sala di korte ayera ta e echo ku Ministerio Públiko ta koriendo tras di Gobièrnu pa nan paga debe ku nan tin na NFI na Hulanda, pa sigui haña rapòrtnan di DNA.

Ta remarkabel ku Gobièrnu tin un debe astronómiko na Hulanda, na e instituto NFI despues ku a traha  basta rapòrt di DNA i nos Gobièrnu no a paga. Ya aña pasá algun sospechoso den kaso di atrako brutal a bai kas, en espera di tratamentu di e kaso mirando ku gobièrnu no tabata kumpliendo ku e pagonan.

Atrobe Ministerio Públiko ta konfrontando problema nan serio ku esaki, mirando ku ya tabatin kaso ku a keda posponé pa motibu ku e rapòrt di DNA nan no a yega Kòrsou. Ayera tambe tabatin un kaso unda un sospechoso ta será pa 15 luna kaba i ainda e rapòrt di DNA no a yega Kòrsou. Ta trata aki di un kaso di violashon, unda e sospechoso Jose. D. lo mester a para responsabel pa e akusashonnan ku tabatin kontra di dje, pero esaki a keda tratá sin rapòrt kual tabata den desbentaha di Ministerio Públiko.

Segun Ministerio Públiko ku den e siman aki gobièrnu lo mester a firma pa traha e rapòrt i promé ku desèmber e rapòrt aki lo mester a yega Kòrsou pa trata e kaso. Tur esaki despues ku ya tabatin basta luna ta warda riba e rapòrt. Ta trata aki di un rapòrt di DNA ku Ministerio Públiko kier a uza komo sosten pa kastigá e sospechoso, pero ayera si wes no a bai di akuerdo pa posponé e kaso.

Esaki despues ku ya a posponé e kaso na 5 okashon i e sospechoso mes a bisa ku tur biaha ta gañ’e ku e siguiente biaha e kaso lo keda tratá den su kontenido. Segun e sospechoso Jose ku wes mr. Edelenbos a bisé ku 28 di ougùstùs tur kos mester ta kla pa trata e kaso den su kontenido despues ku ya el a sinta 15 luna, pero 28 di ougùstùs ora e la yega a bolbe bisé ku e kaso lo no sigui.

El a splika ku e sa ku e ta inosente i ku ta pa esaki e la sinta trankil warda pa e tratamentu di e kaso, pa proba su inosensia pero e ta haña ku awor si a bai muchu largu. Wes mr. van Lieshout a bisa ku e ta di akuerdo ku e sospechoso mirando ku e kaso a dura muchu kaba pa yega korte i e no ta bai posponé esaki atrobe.

Tambe el a splika ku loke tin den e kaso ta sufisiente pa e keda tratá sin e rapòrt di DNA ku NFI ta pendiente pa traha. Mas aleu el a indiká ku e no ta haña mester skucha e testigunan ku ya a keda skuchá di nobo, mirando ku ya nan tin deklarashon basta detayá. E echo ku a tarda pa paga NFI i no tabatin rapòrt sigur tabata den desbentaha di Ministerio Públiko mirando ku wes a disidí ku ta trata e kaso sin esaki.