Debí na uzo di supstansia prohibí…. Michael Pineda suspendé pa 60 wega sin derechi di pago

33
Michael Pineda a keda suspendé pa 60 wega.
NEW YORK – E ofisina di e komishonado di Beisbòl a anunsiá djasabra último, ku e picher di e ekipo Minnesota Twins, Michael Pineda, a risibi un suspenshon di 60 wega sin pago despues di a test positivo pa e supstansia ‘Hydrochlorothiazide’, un diurétiko (un tipo di medikamentu ku ta ponebu orina mas tantu).

Dicho supstansia ta violá e programa kolektivo di prevenshon i tratamentu di Droga di Major League Baseball. E suspenshon di Pineda ta drenta inmediatamente na vigor. Minnesota Twins a emití e siguiente deklarashon por eskrito:

“Nos ta sumamente desepshoná despues di a tuma nota di e suspenshon di Michael Pineda pa a violá e programa kolektivo di prevenshon i tratamentu di Droga di Major League Baseball. Nos ta sostené e polítika di Major League Baseball i su esfuerso pa eliminá tur supstansia prohibí den nos deporte. Di akuerdo ku e protokòl deskribí den e programa kolektivo di droga, Minnesota Twins lo no duna mas komentario relashoná ku e asuntu aki”.

E pelotero mes tambe a emití un deklarashon por eskrito pa medio di e asosiashon di peloteronan di liga grandi, unda e ta pidi despensa na promé lugá i a splika ku ta un konosí di dje a ofresé e medikamentu aki sin resèpt i a sigur’é ku esaki lo yud’é kontrolá su peso. Pineda a splika ku nunka tabata su intenshon pa burla di e sistema i ta spera ku su eror por sirbi komo ehèmpel pa otronan.