Den e Memorial Van Damme bálido pa Diamond League…. Dina Asher-Smith ta gana e final di 100 meter na Brussel

35
Dina Asher-Smith ta gana e final 100 meter di Diamond League na Brussel.
BRUSSEL – E atleta britániko kampion oropeo Dina Asher-Smith a logra e viktoria ayera den e kareda di 100 meter ku a tuma lugá durante e Memorial Van Damme na Brussel.

E atleta britániko a registrá un tempu di 10,88 sekònde riba e kareda ku tabata e ‘race gold’ komo e gran final di 100 meter den e Diamond League i di e forma aki Dina Asher-Smith ta gana e premio korespondiente ku ta un bonus di 50.000 dòler.

E hamaikino Shelly-Ann Fraser-Pryce a finalisá na di dos lugá ku un tempu di 10,95 i e atleta di kosta marfil Marie-Josée Ta Lou a krusa e meta final na di tres lugá registrando un tempu di 11,09 sekònde.

E hulandes Dafne Schippers, ku tabatin poko molester na altura di su lomba, a finalisá na di kuater lugá durante e Memorial Van Damme den e kareda di 100 meter registrando un tempu di 11,22 sekònde, kedando asina basta leu di su mihó tempu di temporada ku tabata 11,04.

E atleta Terrence Agard tambe a mira akshon na Brussel, unda e la trata na buska su klasifikashon pa mundial di Doha riba 400 meter, pero ta finalisá na di 4 lugá den e ‘B-race’ ku un tempu di 46,29. E tempu límite ta di 45,30 sekònde. Agard su mihó tempu e temporada aki tabata di 45,61.

Terrence Agard.

Liemarvin Bonevacia, doño di e rèkòrt hulandes riba 400 meter (44,72), tambe a trata di klasifiká pa e mundial di Doha, ora ku e la kompetí na Andujar, Spaña, pero lamentablemente e tambe ta keda kòrtiku registrando un tempu di 46.04 sekònde.

Liemarvin Bonevacia.