‘Ilegalnan ku a koperá ku hustisia ta haña pèrmit pa keda Kòrsou i kaminda di keda’

113
WILLEMSTAD,— Abogado mr. Ayubi kende tabata na defensa di e sospechoso prinsipal den e kaso Freedom, a trese dilanti ku esun ku ta koperá ku hustisia lo haña benefisio nan manera pèrmit pa keda Kòrsou i tambe kaminda di keda miéntras esun ku no kier koperá mesora ta keda deportá.

Den e notifikashon di pleitu e abogado a evaluá kredibilidat di e testigu nan ku a deklará den e kaso. E defensa a bisa ku tabatin un kombersashon di intake ku e damanan ku lo mester tabata traha komo trago meisjes den e kaso Freedom, unda den e kombersashon aki tabata saka afó ken lo tin deklarashon ku por wòrdu uzá pa e kaso i si esaki no ta e kaso den un siman nan lo keda deportá pa nan pais.

El a bisa ku den e otro parti tin esnan ku tabata yora i pidi pa yudansa i ku tabata deklarashon ku sigur por wòrdu uzá den e kaso kontra di e sospechoso prinsipal i otro kómplise nan. Mr. Ayubi tabata na defensa di Yajaira Nunez Toro,  unda el a bisa ku esnan ku por a deklará lo tabata haña benefisio, unda tabata asta yuda nan pa nan por haña daño perhuisio durante e kaso penal.

E abogado a bisa ku a asta gaña ku su kliente lo mester tabata sa unda un di e dama nan den e kaso ta biba na Venezuela i ku lo a bai kima e kas. E defensa a bisa ku ta notabel ku tabatin inkonsistensia den deklarashon di e víktima i ku e tipo di deklarashon nan aki no por wòrdu konfiá. El a splika ku un di e motibu nan mas importante ku un víktima lo gaña den e tipo di kasonan manera esaki, ta e pèrmit pa e por keda nos pais.

Esaki mirando e situashon ku nan a laga atras na nan ais ku nan kier topa bèk.  E defensa  a trese dilanti ku su kliente nunka no a aserká niun hende pa bin Kòrsou i traha den niun bar. Segun e abogado ku ta e dama nan mes a hasi trámite nan pa por yega Kòrsou i ku tabata nan propio eskoho pa traha den un bar.

Mr. Ayubi den su defensa a trese dilanti ku e dama nan tabata sa kiko tur tin tras di e negoshi ei i komo persona nan madurá i inteligente nan lo tin ku para responsabel pa desishon nan ku nan a tuma. Pa loke ta trata e fiansa ku e dama nan tabatin, e abogado a bisa esaki tabata mas o ménos 1000 dòler i ku e persona ku a kubri e gastu aki tabata aserká Yajaira, pa e por tuma e plaka tiki tiki bèk serka e dama nan.

Tambe el a splika ku for di trempan e dama nan tabata sa kiko e montante aki ta para pe i ku sin te montante aki nan lo no por a drenta nos pais. Segun e abogado ku e montante aki tabata varia i ku esaki tabata inkluí gastunan di biahe, gastu nan di estadia i tambe Wifi, kuminda ku e interes di e fiansa ku nan a hasi pa nan bin Kòrsou.

Abogado mr. Ayubi a añadí ku e montante aki tabata inkluí asta telefòn ku Yajaira tabata kumpra pa e dama nan, na momentu ku nan yega Kòrsou. Mas aleu e abogado a bisa pa e estadia e dama nan tabata paga 400 florin pa luna, unda nan tabata haña kuminda mèrdia i tambe anochi, Wifi i nan tabata keda den kamber ku 3 otro dama.