Kòrsou awe ku e mesun aliniashon di djasabra último

63
Kòrsou awe ku e mesun aliniashon di djasabra último kontra Haiti.
PORT AU PRINCE – Tur kos ta indiká ku lo no tin niun kambio den e aliniashon básiko di e selekshon di Kòrsou, kompará ku esun di djasabra último, ora ku nan enfrentá e selekshon di Haiti awe djamars na Haiti.

E aliniashon básiko di e ekipo di Kòrsou, ku ta ser dirigí pa Remko Bicentini, lo ta idéntiko na esun di djasabra último(4-2-3-1), ku den gol e kiper Eloy Room, den defensa e hungadónan Juriën Gaari, Darryl Lachman, Shermar Martina i Gevaro Nepomuceno, miéntras ku nan dilanti bo ta haña Juninho Bacuna i Jeremy de Nooijer sigui mas dilanti pa un liña di tres konformá pa Brandley Kuwas na banda drechi, Leandro Bacuna mei mei i Elson Hooi na banda robes i den punta e selekshon di Kòrsou lo konta ku Reangelo Janga.

Nos mester remarka ku ta trata aki di un selekshon hopi stabil i ku ta konta tambe ku un bon banki. Si nos defensa por hunga mes sólido ku nan a hasi den e di dos tempu, durante e enkuentro di djasabra último, i nos delanteronan por ta mas skèrpi, nos lo no mester tin problema awe pa logra e viktoria òf a lo ménos saka un empate kontra e fuerte ekipo di Haiti.