Mo Farah tabata e ganadó apsoluto…. Abdi Nageeye ta kore mitar máratòn den ménos ku 1 ora

36
E 3 promé finalista nan di e mitar máratòn ‘Great North Run’.
NEWCASTLE – E koredó di distansia largu, Abdi Nageeye, ayera a kore e mitar máratòn ‘Great North Run’ den ménos ku un ora di tempu. E atleta hulandes a krusa e meta final despues di 59 minüt i 55 sekònde.

E tempu aki tabata mas lihé ku su rèkòrt hulandes ku e la registrá riba 3 di febrüari último. Tabata den e Marugame na Hapon ku e la sa di registrá un tempu di 1.00.24 riba e distansia menshoná.

E tempu di e mitar máratòn ku a sali di Newcastle i ku a finalisá na South Shield no ta konta komo un rèkòrt ofisial, pa motibu ku e ruta aki ta konta ku únikamente un direkshon i tin un diferensha di altura di algu mas ku 30 meter entre e salida i e final.

Pa un rèkòrt keda ofisialmente rekonosé, e diferensha di altura no mag ta riba un meter pa kada kilometer. Tabata e famoso atleta Mo Farah ku tabata e ganadó apsoluto di e kareda aki. E atleta britániko a registrá un tempu di 59 minüt i shete sekònde.

E atleta di Etiopia Tamarit Tola a finalisá di dos ku un tempu di 59.13 miéntras ku Nageeye a finalisá di tres. Abdi Nageeye ta preparando pa kore e máratòn di Amsterdam próksimamente.