Na nomber i honor di Jarzinho Pieter Nos hungadonan unanimamente a disidi ku nan ta hunga

118
E enkuentro di awe lo ta na memoria di Jarzinho Pieter.
PORT AU PRINCE – Despues di e notisia sumamente tristu i lamentabel ku a drenta ayera for di Haiti ku fayesimentu di e kiper Jarzinho Pieter, mas lat durante dia nos a drenta den kontakto ku algun persona ligá na nos selekshon ku aktualmente ta na Haiti i a puntra si e enkuentro di awe lo keda kanselá òf ku esaki lo kontinuá.

Nos a komprondé ku e hungadónan a reuní riba e tema aki i unánimamente a disidí ku nan ta sigui ku e soño di e propio Jarzinho Pieter, un di nos miembronan di selekshon ku ta pusha ku alma i kurpa pa lanta ánimo den nos selekshon i nan ta hunga kontra Haiti awe na nòmber i honor di Jarzinho Pieter.

E hungadónan a partisipá e desishon aki na e staf di FFK ku ta na Haiti i e desishon aki a ser respetá. Despues di a reuní, nos selekshon a resa, i a yama Dios danki pa tur lokual Jarzinho Pieter a nifiká pa e selekshon i pa Kòrsou en general.