Segun fiskal niun mucha menor no ta bai inventá ku nan a keda violá

105
Segun fiskal bo por manipulá screenshot di kombersashon.
WILLEMSTAD,—-Fiskal mr. Dennaoui den su rekisitorio ayera a trese dilanti ku tin tur indikashon ku e sospechoso Jose Gabriel D. lo mester a kometé akto inmoral kontra di 2 menor, ku tabata su yunan di kriansa. Esaki despues ku a bin dilanti ku e víktima nan menor mes a deklará ku nan a keda violá pa e sospechoso.

E fiskal a trese dilanti ku e ta sospechá ku a manipulá e kòmbersashon ku lo a bin dilanti den e kaso, unda por a mira ku mama di e víktima nan lo a bisa ku e ta bai serka e sospechoso, pa motibu ku el a drenta relashon ku un otro dama. Tabata un kòmbersashon ku e mama di e víktimanan lo a sostené ku su prima via di Whatsapp, unda esaki a bin resultá serka e abogado di e sospechoso.

Fiskal mr. Dennaoui a bisa ku e no ta kere e deklarashon aki mirando ku e mama di e víktimanan a keda skuchá komo testigu den sala di korte i e la desmentí di a papia e kos aki ku su prima. Mama di e víktima nan a deklará ku en bèrdat el a papia ku su prima, pero e no a papia e kosnan ei. Mas aleu el a bisa ku e no ni tabatin e number di telefòn ei mas temporada ku ta insinuá ku el a papia e kosnan ei.

Pa esaki fiskal a pidi pa posponé e kaso pa asina skucha e mama di e víktima nan un biaha mas i tambe e prima ku lo a bai ku e kòmbersashonnan serka e abogado, pa asina hasi algun pregunta. Mas aleu fiskal a bisa ku e kier pa warda pa haña resultado di tèst di DNA pa asina por proba ku e sospechoso tabatin kontakto ku e víktima nan.

Wes mr. van Lieshout a bisa ku e no ta haña mester posponé e kaso, mirando ku ya pa basta luna ta para e kaso i ta bin ku otro petishon di investigashon i ku no ta nesesario pa warda rapòrt di NFI, pa trata e kaso. El a bisa ku esaki no ta bai kambia nada mirando ku e DNA no ta di spèrma, esta ku esaki no por proba ku nan a wòrdu violá.

Tambe el a rechasá pa skucha mama di e víktimanan mirando ku ya a skuch’é na 3 okashon, miéntras el a indiká ku ya a skucha e prima di e mama tambe komo testigu i no mester mas. El a disidí ku ta sigui ke kaso, unda fiskal mr. Dennaoui a insistí ku e sospechoso ta kulpabel, unda el a trese dilanti ku 2 mucha menor no ta bai inventá ku nan a keda violá anto detayadamente asina.

E fiskal a bisa ku kada un di e menornan a deklará detayadamente kiko a pasa i bisa ku e kos ei tabata pasa 2 menor di edat. Tambe el a splika ku e menornan no kier a bai kas ku e sospechoso, mirando ku nan tabatin trouma di loke tabata sosodé i a asta bisa ku e sospechoso tabata duna nan karchi telefòn despues ku e kometé e aktonan aki kontra di nan.

Ministerio Públiko a bisa ku Jose mester para responsabel pa su akto i ku e mester sinta kastigu di prizòn pa esaki. A pidi 6 aña di prizòn pa e sospechoso unda wes lo dikta sentensia 30 di sèptèmber próksimo den e kaso. 30 di sèptèmber próksimo lo dikta sentensia.