Segun Leclerc nunka ántes e no a keda dje kansá aki…. Leclerc ta kibra ku e sekia di viktoria di Ferrari na Italia

35
Charles Leclerc ta optené su di dos viktoria konsekutivo den F1.
ITALIA – Charles Leclerc a pone fin na un espera di nuebe aña di e ekipo Ferrari pa un viktoria na kas, resistiendo un atake formal di e dos vehíkulonan di Mercedes pa asina finalmente konkista e viktoria den e Gran Premio de Italia djadumingu. Esaki tabata alabes Leclerc su di dos viktoria konsekutivo den Fórmula Un, sumando asina su di dos viktoria di su karera den Fórmula Un.

E hóben oriundo di Monaco di 21 aña, ku a start e kareda for di e ‘poleposition’, a risibí un ovashon di aplouso  di parti e fanátikonan di Ferrari na momentu ku e la krusa e meta final ku ocho désimo di sekònde di bentaha riba e finlandes Valtteri Bottas i 35,1 sekònde promé ku e britániko Lewis Hamilton, aktual lider di e kampionato.

E último bia ku Ferrari a gana na Monza ta data for di 2010 i tabata pa medio di e spañó Fernando Alonso. “Esta un kareda. Nunka ántes mi a yega di keda dje kansá aki despues di un kareda”, asina Leclerc a komentá djis despues di e kareda di djadumingu.

“Mi sa ku mi a hasi algun fout, pero finalmente mi a finalisá na promé lugá tòg. Mi ta konsiente ku mi no mester hasi e fout nan aki den futuro, pero pa mi suerte esakinan no tabata dje grandi ei.” “Esaki tabata e promé fin di siman den mi karera ku e úniko kos den mi mente tabata, gana.”