‘Si e ta limpia den e bar no ta nifiká ku e sa kiko tur ta pasa ei den’

149
Abogado mr. Snel tabata na defensa di K.N.
WILLEMSTAD,—- Abogado mr. Snel den su notifikashon di pleitu di e kaso Freedom, a trese dilanti ku su kliente K.N. tabata traha den e bar i e tabata limpia esaki. El a splika ku e echo ku e tabata limpia den e bar no ta nifiká ku bo sa kiko tur ta pasa den e bar aki ku e dama nan.

Esaki despues ku e dama nan a trese dilanti ku tabata trata nan hopi malu i ku manera nan yega Kòrsou nan tin un debe di 1600 florin i mester kuminsá traha hopi duru pa likidá esaki mesora, miéntras tambe lo mester a paga pa diferente otro kos. E dama nan lo a deklará ku nan tabatin ku paga asta pa Wifi, pa koriente i tambe estadia den kas di e dama Yajaira Nunez Toro ku ta e sospechoso prinsipal den e kaso.

Mr. Snel den su defensa a trese dilanti ku su kliente ku ta yu di e sospechoso prinsipal, tabatin algun dama ta keda na su kas pero e no tabata responsabel pa nan, unda el a añadí ku un di nan tabatin su relashon ku un yu di tera. Mas aleu el a añadí ku den e deklarashonnan mes por a mira ku no tabatin konfrontashon di su kliente ku e dama nan.

Segun e abogado ku si mira e deklarashon di C. por mira klaramente ku e orarionan ta bisa tur kos, esta ku no tabatin konfrontashon. Tambe e la bisa ku tambe por mira ku su kliente tabata konosé solamente e dama nan ku tabata keda serka dje i ku nan no tabatin obligashon di dun’é kuenta di rason unda nan ta durante di dia.

El a sigui splika ku e dama nan tabatin nan libertat i ku nunka su kliente no tabata sa ni tabata puntra nan kiko nan tabata bai hasi durante di dia. Mas aleu el a indiká ku K.N. tabata simplemente un trahadó na e bar di su mama i ku e no tabatin niun ganashi ku e entrada di e bar di su mama. A bin haña algun dokumento den telefòn di e dama K.N. unda e abogado a bisa ku Ministerio Públiko ta insinuá ku su kliente ta esun ku tabata registrá tur kos, esta e ta esun ku tabata konta e ficho nan di e trago nan.

E abogado a trese dilanti durante e kaso ku komo e persona ku ta limpia e bar, e mester limpia esaki detayadamente, mirando ku un dia despues ku e bar tabata habrí tin basta kos tirá i bentá abou den e negoshi. Mr. Snel a bisa wes ku ta pa esaki a haña e dokumentonan den e telefòn di e dama, esta dor ku el a haña esaki nan bentá el a saka foto di nan pa puntra kiko e mester hasi ku nan.

Tabata despues ku e dama K.N. lo a tende ku e mester skonde e dokumento nan ei leu, ku el a disidí ku nunka mas e ta saka foto di e dokumento nan ei. Mr. Snel a bisa wes ku e echo ku e sospechoso tabatin e foto nan den su telefòn, no ta nifiká ku e tabata sa di e sirkunstansia nan. El a sigui splika ku kuantu biaha un persona ta saka foto di un situashon, sin sa kiko tabata pasando ei nan?

E abogado a pleita fuerte pa su kliente, despues ku Ministerio Públiko a pidi pa e sinta 3 aña di prizòn. Ministerio Públiko representá pa fiskal mr. de Groot a pidi 4 aña di prizòn pa K.N. di kual 1 di nan ta kondishonal ku 3 aña di prueba. 27 di sèptèmber próksimo lo tin sentensia den e kaso.