10 aña pa preparashon kontrabanda 1000 kilo kokaina

567
1 aña pa kada 100 kilo kokaina
DEN HAAG—Na Den Haag fiskal a pidi 10 aña kastigu den un kaso kaminda a importá 1000 kilo di kokaina for di Sur-Amerika.

E transporte a keda konfiská pero hustisia ta mira un intermediario komo klave den e trafikashon di kokaina pa Rotterdam. For di 2016 polis a haña un tep ku e sospechoso di 38 aña ta importá droga for di sur Amerika. Asina a start e investigashon ku a dura kasi un aña. Reshèrshi a konkluí ku e sospechoso tabata prepará un transporte grandi di kokaina via un ret. Grabashonnan telefoniko ta indiká ku e sospechoso di Den Haag tabatin diferente hende den hafnan di Antwerpen i Rotterdam pa deskarga e droga for di konteinernan prome ku nan pasa den scan. Pa hasi esaki nan a paga 50.000 euro pa pone e konteiner den un lots. Mas aleu e sospechoso tabatin un kontakto na Schiphol ku tabata traha den sekshon di maleta. Via e ruta aki tambe por a transportá kokaina pa Hulanda. Durante e investigashon e sospechoso a muda su aktividatnan di kontrabanda pa e mes organisá e transportenan. E tabata viaha regularmente algun dia pa Colombia i Peru kaminda e tabatin palabrashonnan ku trafikantenan. Tambe el a bai Spaña ku un sosio di Amsterdam. Posiblemente nan tabatin reunionnan ku un finansiadó. E sospechoso no tabatin trabou. Den 2017 a detené e sospechoso den su kas. A konfiská diferente material pa paketa droga. huntu kune a detené 7 sospechoso mas, inkluso un hòmber di Leiden, unu di Amsterdam i su amiga. E pruebanan den e kaso ta prinsipalmente di grabashonnan den kua ta papia den code di droga. preparashon di trafikashon di droga tambe ta kastigabel hasta ora e merkansia no yega Hulanda. Fiskal a pidi 10 aña pa e sospechoso prinsipal i te 4 aña pa e otro sospechosonan.