Awe ta inisio di e di 30 seri final Bola 8 pa ekipo

51
Ekipo ku a partisipá den tur e 30 kompetensianan.
WILLEMSTAD—E presidente di Federashon Biar Kòrsou, Sybren Boekhoudt, ta sumamente kontentu di por anunsiá inisio di e di 30 final di kampionato di Kòrsou bola 8 pa ekipo. Esaki lo tuma lugá awe nochi i ta danki na patrosinio di Montana Bierhuis i House of Billiard Play, ámbos ubiká den Lanthùis Granbeeuw.

Kampionato regular di ekipo Bola 8 a kana super bon i Febiko por anunsiá ku na promé lugá a finalisá The Biesheuvel Friends, na di 2 Breaking Bad, di 3 Maishi Tigers i na di 4 Montana Players.

30 aña pasá, na 1989, e ekipo CUB, Club Union Boneriano a titulá kampion di e promé kampionato pa ekipo organisá pa federashon.

Awe nochi pa 8or, den House of Billiard Play ta inisiá e di 30 final ku lo keda disputá entre e ekiponan Breaking Bad i The Biesheuvel Friends. Bon pa menshoná ku e último ekipo aki a partisipá na tur e 30 añanan di e evento pa ekipo. E ekipo TBF ta eksistí pa 36 aña i 3 di su miembronan ta e úniko biardistanan ku a partisipá na tur e 30 kampionatonan aki.

Ta trata di Johnny Hellmund, Enrique ‘Shonri’ Jacobino i Michael Arvelo. Pues awe nochi e bataya pa e titulo kampionil ta kuminsá i ta sigui djasabra atardi pa 4’or i seguidamente djamars dia 17, pa 8’or anochi.

E ekipo ku gana 3 partido promé ta titulá kampion.

Federashon Biar Kòrsou ta invitá tur amante di deporte en general pa bin apoyá e ekiponan aki.

Tur partido ta tuma lugá na Lanthùis Granbeeuw