Ayera mèrdia selekshon a regresá for di Haiti

148
'Sontje' ku un di e pèchinan dediká na Pieter, ku tur miembronan tabatin riba kabes.
WILLEMSTAD—Despues di a yega Kòrsou siman pasá djaluna dia 2 sèptèmber 2019, práktika durante di siman tras di lomba i a realisá weganan djasabra i djamars último, miembronan di e delegashon di nos selekshon nashonal di futbòl a regresá kas ayera.

2 wega vs Haiti

Manera ya ta konosí, e ekipo dirigí pa tékniko Remko Bicentini a topa e selekshon di haiti den 2 wega bálido pa Nations League resientemente.

Na Kòrsou

E promé tabata na kas den Stadion Ergilio Hato na Brievengat djasabra último, na momentu ku Kòrsou a gana ku skor mínimo, despues ku Elson ‘Sontje’ Hooi a anotá den e parti komplementario di e partido.

Na Haiti

Seguidamente tabata djadumingu ku nos ekipo a biaha pa Haiti, unda djamars último nan a realisá e wega di buèlta, den stadion Sylvio Cator na Haiti. Tabata enkuentro ku a finalisá den un empate na 1 gol, unda ku un biaha mas Elson ‘Sontje’ Hooi tabata e goliadó pa Kòrsou. Esaki den e parti inisial di e wega, na momentu ku nos tabata atras den e markadó.

Na kabes di grupo

Despues di a logra un triunfo i un empate kontra Haiti, den e dos weganan realisá, unda awor nos ta komandá den e grupo, ku tin tambe Costa Rica, ku ainda no a mira akshon, e delegashon lokal a regresá kas ayera, den oranan di mèrdia.

Wega i pèchi dediká na ‘Ziño’

Un ke otro unda tur miembro tabatin un pèchi riba na kabes, unda e dedikashon tabata na Jarzinho Pieter, kende tambe tabata parti di e buelo pa bai Haiti, pero no a regresá ayera ku e grupo. Esaki tambe tabata hustamente ku futbolistanan a dediká e partido na Haiti, tambe na su persona.

Miembronan di e delegashon tabatin un pèchi, riba kual tabatin e kiper su number i nòmber i tambe emblema di FFK, ku kolonan di nos bandera.

Yegada

E delegashon lokal a keda risibí pa algun konosí, miembronan di famia i algun miembro di prensa deportivo, pero sin muchu atenshon, teniendo kuenta kisas ku e orario i tambe e situashon.

Sintimentu miksto

Pues un situashon di sintimentu miksto, unda tabata lamentá e pèrdida di ‘Ziño’, pero ku un i tur tòg satisfecho ku e resultado di nos ekipo, hungando for di kas i den un situashon ya konosí, ta logra regresá kas ku un empate i asina akumulá 4 punto di e 6 nan ku por a optené.

Bishita famia Pieter

Seguidamente a sali direkshon kas di nos kiper, kende ya no ta mas ku nos riba e mundu aki, unda a kumindá miembronan di famia, ku palabranan di sosten i kondolensia pa ku nan pèrdida.

Kome i regresá kas

Finalmente a sigui pa un restorant unda miembronan por a kome, relahá, kòmbersá i deshogá nan mes huntu, promé ku mas den oranan di atardi, e grupo for di Oropa a subi e koloso direkshon Schiphol, pa asina regresá kas i demas di nos isla tambe for di ayera ta bèk serka famia i sernan kerí.