Gobernadó: Nos prioridat ta krea mas pilar ekonómiko

245
Goernado Lucille George Wout

Willemstad,– “Un Kòrsou próspero ta dependé di un ekonomia fuerte ku ta diversifiká, duradero, kompetitivo i ku ta krea trabou pa tur su habitantenan”, asina gobernadó George Wout a duna di konosé. El a bisa ku ounke den 2020 ainda nos lo tin retonan finansiero, ta sumamente importante pa implementá entre otro e Strategia di Kresementu pa asina nos por ‘jumpstart’ nos ekonomia, traha riba reformanan struktural i logra desaroyo duradero.

E strategia pa realisá kambionan struktural i positivo pa nos ekonomia ta un proseso ku lo dura algun aña. Den 2020, Ministerio di Desaroyo Ekonómiko lo keda duna prioridat na e trayekto pa mehorá nos struktura ekonómiko dor di eliminá Red Tape. Nos lo logra esaki dor di simplifiká i digitalisá e proseso pa entregá e diferente pèrmitnan ekonómiko. Tambe lo kambia e sistema pa ehekutá kòntròl despues di a entregá pèrmit, no promé ku haña pèrmit.

Un otro prioridat ta krea mas pilar ekonómiko. Un pilar ku aktualmente nos ta desaroya mas fuerte ta e sektor di eksportashon pa diversifiká nos ekonomia. Nos ta stimulá kompanianan lokal den tur sektor pa eksportá nan produktonan i servisionan. Tambe lo duna guía na e empresarionan ku tin mester yudansa riba e tereno aki. Ya pa dos aña kaba ta organisá e Siman di Konsientisashon pa Eksportashon (National Export Awareness Week) i e aña aki a kuminsá ku formulashon di un Strategia Nashonal pa Eksportashon bou di guia di International Trade Centre ku tin su sede na Ginebra, Suisa.

Implementashon di e maneho di Empresa Mediano i Chikitu (MKB) ta otro prioridat di MEO paso ta nan ta wesu di lomba di ekonomia di un pais. P’esei e meta pa krea i pone disponibel instrumentonan adaptá na nesesidat di kompanianan i p’asina nan por fortifiká nan kompania lokal i/òf internashonal.