Konsulado hulandes lo kordiná kuido di kurpa di ‘Ziño’

3962
Selebrando gol di Korsou ku 'Ziño' su kamiseta.
WILLEMSTAD—Ayera den oranan di mèrdia, miembronan di nos selekshon nashonal di futbòl, a regresá Kòrsou. Esaki unda ku e kurpa di e kiper suplente, Jarzinho ‘Ziño’ Pieter, kende a fayesé na Haiti, si a keda tras.

Un ke otro debí ku dirigentenan lokal, despues di a risibí un tremendo trato i sosten di konsulado hulandes, a laga tur kos den man di miembronan di e konsulado.

Esaki debí ku e kurpa ta konfiská, pa asina finalisá ku investigashonnan unda lo mester hasi outopsia pa asina determiná e kousa eksakto di e morto.

Relashoná ku esaki i mirando ku no sa presisamente kuantu lo bai dura, konsulado hulandes, lo kordiná tur kos, kual ta entre otro e kuida di e kurpa di e defuntu, pa na momentu ku lo tin ku hasi e outopsia i tambe despues ku kaba ku esaki, pa prepar’é pa e biahe pa regresá Kòrsou.

Tambe nan lo kordiná dokumentunan korespondiente pa por hasi e biahe di regreso, pa finalmente avisá na momentu ku tur kos ta kla i reglá, pa asina por bai buska e kurpa.

Ta e intenshon pa na momentu ku ta asina leu, un representante di FFK, kompañá pa un miembro di famia hasi e biahe, pa regla tur kos na Haiti i buska e kurpa, pa asina e entiero por tuma lugá riba nos isla.

Pues sigur algun investigashon i trámitenan, ku ainda lo mester bai tuma lugá i lo tuma su tempu, miéntras ku famia, amigu, konosínan i Kòrsou kompletu ta pendiente, pa yegada di e kurpa di e legendario, pa su último ayó.