Kontrato di ‘Kenny’ i ‘Djodjo’ ta spoorloos ?

782
Kenneth 'Kenny' Kunst.

WILLEMSTAD—Informashonnan ku Deporte Vigilante a risibí, ta indiká ku lo no por haña kontratonan di Kenneth ‘Kenny’ Kunst i tampoko Randel ‘Djodjo’ Winklaar ningun kaminda.

Esaki despues ku dirigentenan di Jong Holland ta insistí ku ámbos a firma un kontrato ku nan, kual a keda entregá na FFK, huntu ku un chèk korespondiente. Miéntras ku no por lokalisá e kontratonan ningun kaminda, por konfirmá si ku FFK a kambia e chèk risibí, den ménos ku 24 ora.

Di otro banda, pa loke ta sigur e kaso di Kenneth ‘Kenny’ Kunst, pa kual dirigentenan di Centro Barber lo a hasi informashon na FFK pa su situashon, Stanley Coffie, miembro di direktiva di FFK, a pone nan na altura, ku e futbolista en kuestion, no tin un kontrato.

FFK mas aleu, resientemente a hasi publikashon tambe indikando ku tabatin 24 petishon pa subi lista di transferensia unda solamente 7 a keda honrá. Mas aleu tambe nan a splika ku tin 2 kaso ku ainda ta bou di investigashon.

Esaki referiendo na e futbolistanan ariba menshoná, kende tabata ku e ekipo trikolor, durante di e 2 temporadanan ku ta tras di lomba.

Pues ainda no tin nada konkreto, pa loke ta e situashon di e futbolistanan Kunst i Winklaar, si esakinan tambe lo por ta riba e lista di transferensia of ku nan no tin un kontrato.