Liberty Latin America ta anunsiá kompra di e 12.5% ku tabata falta di UTS

354
AraratLiberty Latin America Ltd. (“LLA”) awe a anunsiá ku el a kompletá e kompra di e 12.5% ku tabata falta di United Telecommunication Services (“UTS”).

Na mart di e aña akí, LLA a kumpra 87.5% di UTS, i e kompra di e sobrá 12.5% tin awor komo resultado ku LLA ta doño di UTS pa 100%. E gobièrnunan di Kòrsou i St. Maarten tabata doño di respektivamente 87.5% i 12.5% di UTS.

C&W Communications (“C&W”) ta parti di LLA, i e operashon di UTS ta raportá na Sr. Nicolas Collette, visepresidente di C&W, Southern Cluster, ku ta inkluí tambe Barbados i Trinidad & Tobago.

“Esaki ta un momentu eksitante pa telekomunikashon den Karibe Hulandes, pasobra despues ku LLA a kumpra e 12.5% ku tabata falta di UTS, awor nos ta posishoná ainda mas mihó pa agregá balor na nos klientenan i brinda konektividat i entretenimentu di primera klase,” Sr. Collette a bisa.

“Nos ta hopi orguyoso di ta operando den Karibe Hulandes i den e último lunanan nos a traha duru pa establesé puntonan nobo di referensia pa loke ta trata balor, dunamentu di servisio, i sosten na kliente. Collette a bisa tambe ku e proseso di integrashon entre LLA i UTS ta progresando sin problema.”

“Nos ta trahando huntu estrechamente i tur dos marka, Flow i UTS, a bin ta kompartí práktikanan óptimo (‘best practices’) pa realisá e benefisionan máksimo di nos kompania nobo kombiná. Tambe nos a bin ta tene tur nos ‘stakeholders’ informá durante kada paso ku nos a tuma, i awor nos ta mira dilanti na un kolaborashon duradero, miéntras nos ta sigui konektá e hendenan di Karibe Hulandes i krea momentunan ku ta importante pa nos klientenan,” el a bisa.

Liberty Latin America ta un kompania lider den telekomunikashon, operando den mas ku 20 pais den Amérika Latino i Karibe, bou di e markanan VTR, Flow, Liberty, Más Móvil, BTC i Cabletica, miéntras ku UTS ta brinda servisionan fiho i mobil n’e islanan di Kòrsou, St. Maarten, St. Martin, Boneiru, St. Barths, St. Eustatius i Saba.