Miembronan di selekshon futbòl a bishitá famia Pieter

269
Hungadonan huntu ku e maleta di Pieter den kurá di kas di famia Pieter.
WILLEMSTAD—Ayera mèrdia miembronan di nos selekshon di futbòl, a hasi un bishita na kas di famia Pieter. Esaki komo promé kos, despues di a yega Kòrsou for di Haiti, unda a bai kumindá i duna kondolensia na famianan di kiper Jarzinho ‘Ziño’ Pieter.

Esaki tabata un momentu hopi doloroso i duru tantu pa nos selekshonadonan, komo pa e señora mama i tambe demas famianan di e defuntu.

Durante di e bishita a entregá famianan e maleta di nan ser kerí i tambe e kamiseta di unifòrm number 22 i tambe un pèchi, na e tata i mama di nos kiper i nan yu stimá.

Tabata un momentu di hopi tristesa, unda ku un i tur ku awa na wowo, tabata kumindá miembronan di famia, ku palabranan di sosten i kondolensia pa ku nan pèrdida, pa finalmente tambe a inmortalisá e momentunan aki, ku algun potrèt di miembronan di famia ku nos miembronan di selekshon.

Miéntras tantu konforme komunikado di FFK, nan lo hasi di nan banda tur loke ta nan alkanse pa e kurpa bin Kòrsou mas lihé ku ta posibel, unda ku tin un durashon di minimal 8 dia, normalmente.