Pareha yu di Kòrsou envolví den tiroteo akusá tambe di labamentu di plaka

A paga 80 mil euro kèsh na hür di kas

6099
Range Rover ku e pareha yu di Kòrsou tabata move aden.
Hulanda—– Ketu bai e pareha kurasoleño ku a keda detené despues di e bashamentu di bala den Rotterdam ta sera pa asina por a hasi mas investigashon.
Esnan ku a bin pa likidá nan tabata move den e BMW stationwagen.

Tabata djamars den oranan di mainta ku a tuma lugá un bashamentu di bala pisa den e bario di Rotterdam pa ta mas eksakto Duikerstraat. Einan a bin un konfrontashon entre okupantenan di un SUV Range Rover kontra di e okupantenan di un BMW. A bin tuma nota ku den ambos vehíkulo tabatin un dama i un hòmber tras di stur. Segun testigunan a hasi uso di arma outomatiko unda for di tur vehíkulo tabatin losmentu di bala. Tantu e SUV komo e outo BMW  keda tras ku un kantidat di perforashon. Na e sitio di e tiramentu mes Polis a detené e dama Radelita C. Di 45 aña i tambe un hòmber di 37 kual De Telegraaf ta redaktá. E dama i e hòmber den e BMW a kore bai na un distansha pa despues baha for di e vehíkulo unda bou di menasa di arma di kandela a kita un Audi A 6 for di un suidadano i a hui bai for di e sitio. Mas despues a bin topa ku e vehíkulo bandoná den Rotterdam mes. E mesun dia a tene un entrada hudisial den kas di e dama C. Segun e korant Telegraaf e dama C ta un bon konosí di Hustisia i no mas ku 3 luna pasa tabata para den korte pa un kaso di labamentu di plaka di basta mil euro i durante di e investigashon a bin hañ’é ku basta prenda kostoso i tambe paña nan di marka. Ta trata di un kaso di for di aña 2015. E tempu ei e la keda solamente 1 dia sera. Tambe a akusá e dama di a paga suma nan kuantioso na un krèsh pa su yu. Tambe e lo mester a stort un suma di mas ku 30 mil euro na banko i a paga un montante di 80 mil euro na hür di un kas. Ministerio públiko ta haña ku e dama aki mester sa ku e plaka ta bin for di algu ilisito den e kaso aki  plaka kriminal. Na e momento aki wes a manda e kaso bek na wes komisario pa asina por a hasi mas investigashon entre nan tende testigu. Den e kaso di djamars último ta sospecha di un kaso di likidashon unda tabata kier a likidá e dama ku su partner ku tabata moviendo den e Range Rover.•