Ta kanando diferente trayekto pa haña e finansiamentu di 200 mion florin

Ainda no a tende nada di gobièrnu hulandes:

437
HNO: Clifton Walle a konfirmá ku no a tende nada ainda di gobièrnu hulandes. Nan ta karga e optimismo ku 15 di novèmber ta alkansabel ainda.
WILLEMSTAD—N’e momentu nan aki HNO ta den su fase final, pero ta imperativo e 200 mion florin èkstra ku mester pa kaba e trabounan. Siman pasa tabatin hasta rondleiding na HNO i na bista di esnan ku tabata presente e hospital ta práktikamente kla pa loke ta e edifisio, pero mester di e 200 mion florin pa por entrega esaki dia 15 di novèmber próksimo. Manera ta konosí Gobièrnu di Kòrsou a bati na porta di esun hulandes pa un fiansa di 200 mion florin hulandes.

Promé ku nan a hasi esaki HNO ya a regla e fiansa ku konsorsionan lokal na rason di 5% di interes, pero kier a pone HNO komo garantia pa e fiansa aki . Gobernador Lucille George Wout no a bai di akuerdo ku esaki i komo tal a ninga di firma e dekreto. Esei a trese kuné ku gobièrnu a disidí na bati na porta di Hulanda, pero te ku awe 12 di desèmber no a risibí niun kontesta, siendo ku e plannan ku tin riba mesa ta pa entrega e hospital dia 15 di novèmber próksimo.   Ta saliendo na kla ku ainda e 200 mion florin no a keda kla. Vigilante tabatin kontakto ku Clifton Walle i e la rekonosé ku enbèrdat nan no a tende nada pa lokual ta trata e 200 mion florin for di Hulanda. Si el a mustra Vigilante ku tur nan konsentrashon ta si pa por logra entrega e hospital dia 15 di novèmber próksimo manera ta palabra. E ta rekonosé si, ku pa logra esaki parti di dje ta sinta den e fiansa di 200 mion florin. Kada dia ku pasa ta bai hasi e situashon mas ferfelu, pero Clifton Walle a indiká na Vigilante ku nan ta trahando duru pa logra e meta di entrega di 15 di novèmber. E ta spera ku mas pronto ku ta posibel lo keda kla. For di e kombersashon por a bolbe saka afó ku no ta bai sinta mas riba Hulanda. Clifton Walle a indiká na Vigilante ku nan ta kanando ya kaba diferente trayekto. E ta spera ku nan (Gobièrnu di Kòrsou) lo por haña un kontesta mas lihé ta posibel. E la mustra Vigilante ku e senario ta di dia pa dia, pero ku no ta sin mas por kue Hulanda pone un banda, paso esei ta algu ku ta Gobièrnu di Kòrsou ta atendé. Tur loke ku nan kier hasi ta entrega e hospital e fecha ku a keda akordá. E ta konsiente si dje echo ku si pa fin di luna no tende nada di Hulanda ku e fecha di 15 di novèmber lo por pèrta, pero e la keda mustra Vigilante ku nan ta trahando duru pa 15 di novèmber ta alkansabel.•