Preokupashon den seno di Partido PAR

Relashoná ku desaroyonan rondó di Minister Alcala Walle

6786
WILLEMSTAD—Komo 3 siman pasa Vigilante tabata e promé medio di komunikashon ku a duna atenshon na e echo ku Minister Marilyn Alcala Walle tabatin dòbel funshon siendo minister.

Manera ta konosí konforme artíkulo 10 di screening na momentu ku formador ta tratando e proseso di formashon di gabinete tur minister mester distansia nan mes di un negoshi òf fundashon ku nan ta forma parti di dje. Den kaso di Marilyn Alcala Walle e no a hasi esaki, pero a hasta hasi uso dje fundashon ku ta karga su nòmber pa por a hasi sierto invitashon na eks studiantenan ku tin debe di estudio. Mester bisa ku na su defensa el a duna di konosé ku e trabounan ku e tabata desplegá pa e fundashon ku ta karga su nòmber tabata unu boluntario.

Pa artíkulo 10 di lei di screening esaki no ta konta, paso esaki ta bisa on kla ku bo tin di distansia bo mes, pa bo por bira minister. Entre tantu ta asina ku e publikashon aki a trese kuné moveshonnan den e arena polítiko te ku keho a ser entrega kontra dje titular enseñansa. Lokual ku a yega na konosementu di Vigilante ta ku e desaroyonan rondó di Marilyn Alcala Walle tin eksponentenan di PAR preokupá, debí ku ta pa e mesun situashon aki eks minister Steven Martina mester a baha te ku OM mes a konfirmá ku konforme lei di screening, el a kometé un echo kastigabel. Den seno di PAR  nan no sa kon pa atendé ku hinter e situashon aki, segun nos a keda informá. Hasta ta asina ku nan ta mira poko skeptiko den direkshon di MAN, paso nan no sa for di kua huki e informashon di Marilyn Alcala Walle a sali.

Nan ta konsiente ku tardi òf tempran, nan mester atendé kue situashon rondó di Marilyn Alcala Walle awor ku a sali na kla ku keho a ser entrega, segun Vigilante a keda informá. Miéntras tantu ta asina ku tin gritunan polítiko ku ta mustra riba e echo ku ta mihó e minister renunsia di su kargo, siguiendo asina e ehèmpel di Steven Martina.