Detenidonan ta entrega keho di intento di asesinato kontra bewakernan

Ta tira ku shotgun riba drone i hagel a hera di herida nan

1121

Willemstad— Detenidonan di blòk 4 ta sumamente rabia e sistema ku e bewakernan a bin ta trata nan i asta awor ta teme ku algu por pasa nan un di e dianan aki den oranan di mardugá ora kualke drone bula pasa riba Prizon unda nan ta enkarselá.

Detenidonan sumamente indigná ku loke nan a bin ta pasa aden últimamente. A splika ku ayera un biaha mas tabatin bashamentu di bala riba Blòk 4 despues di a tuma nota di un Drone den serkania di e blòk. E detenidonan a splika ku e bewakernan ku e polis Cijntje na kabes tabata riba Blòk 4 despues di a tuma nota di un Drone bulando den serkania di e blòk. E detenidonan a sigui splika ku e bewakernan mester a kuminsá tira riba e drone hasiendo uso di shotgun i tambe e arma glock. Bala nan tabata skeiru pa loko ku e intenshon di tumba e glock pero sin e resultado deseá. Ta konosí ku e bewakernan no por tira asina sin mas riba e drone nan pero ta hasiendo esaki tòg ku tur e konsekuensha ku esaki por trese kuné. E detenidonan a sigui splika mané ayera den oranan di anochi ora a kuminsá basha bala pa loko nan mester a kore bai skonde tras di muraya debí ku bala no tin wowo. Na final di e bashamentu di bala sin por a tumba e drone a bin haña hagel den sèlnan benta i tambe a bin haña huls di bala i tambe e huls ku a ser usa den e shotgun. Segun e detenidonan si a bin haña hagel den nan sel esei kiermen ku e hagel a bin dal den e muraya di nan sel ku tur e konsekuensha ku esaki por a trese kuné. E detenidonan a kue tur e ophetonan aki i a bai entrega nan den man di Mando Polisial ku a splika ku e na su turno no a tende di niun tiramentu ya ku ainda no a traha un rapòrt di e kaso ei. E detenidonan a splika ku kada bes ta basha bala pa loko kual no tin mag. Te ainda segun e detenidonan ta un drone e bewakernan a yega di tumba hasiendo uso di e shotgun pero si ta sigui tira pa loko. Loke si tin ku bisa no mas ku siman pasa a bin topa ku un detenido riba dak di Blòk 4 ku a bai subi pa asina rekohé artíkulonan ku e drone a bin kuné ya ku e aterisahe a bai robes. E dia ei e bewakernan a atendé ku e detenido i awor e na su turno ta wardando e kastigu ku e meresé pa a sali for su sel i a subi riba dak di e instituto. Por a komprondé ku e luna benidero aki Minister di Hustisia lo laga instalá e sistema di radar riba Prizon kual lo evitá ku drone por bula yega riba Prizòn.