Minister Girigorie ta lamentá Fake News tokante kámara i alarma na warda di polis

436
Señor Girigorie su promé reakshon tabata ku esaki ta Fake News. Minister a bisa Vigilante ku e ta den reunion di ministernan ku ta tuma lugá tur djarason i ku niun otro hende te na e momentunan ei no a yam’é, pues e no ta komprondé kon nan por ta bisa ku nan no a hañ’é.
E bosero di kuerpo polisial señor Imro Zwerwer a bisa ku e lokual nan a bin den notisia no ta bèrdat (Fake News) i ta na momentu ku ta hasiendo trabounan di konstrukshon ku un kabel a kibra i alarma a kai afó un ratu.
Willemstad,– Durante dia ayera tabatin un notisia ta kore rònt ku tin investigashon tumando lugá na warda di Polis na Rio Canario pa trata di saka afó kon bini e sistema di alarma i kámara prinsipal den e área di e magazina di arma no ta funshonando i ku tin un sospecho fuerte ku esaki a ser deskonektá intenshonalmente ku metanan kriminal. Tambe a bisa ku no por a haña ni relashonista públiko di polis i tambe minister di hustisia pa a tende nan vershon di e tópiko aki.

Vigilante mester bisa ku manera e notisia aki a kuminsá plama, nos a tuma kontakto ku minister di hustisia i nos mester bisa ku nos SI a logra haña minister di hustisia, manera semper nos sa hañ’é.

Señor Girigorie su promé reakshon tabata ku esaki ta Fake News. Minister a bisa Vigilante ku e ta den reunion di ministernan ku ta tuma lugá tur djarason i ku niun otro hende te na e momentunan ei no a yam’é, pues e no ta komprondé kon nan por ta bisa ku nan no a hañ’é. Tambe el a splika Vigilante kuerpo polisial lo reakshoná i splika kiko ta e bèrdat, pero ku en todo kaso e loke a kore rònt, e minister ta bisa ku tabata Fake News.

REAKSHON DI KUERPO POLISIAL
Bosero di kuerpo polisial señor Imro Zwerwer a reakshoná i a bisa ku no ta pasando nada partikular. E bosero di kuerpo polisial a bisa ku e lokual nan a bin den notisia no ta bèrdat (Fake News) i ta na momentu ku ta hasiendo trabounan di konstrukshon ku un kabel a kibra i alarma a kai afó un ratu. Tambe el a bisa ku a kita e kámaranan paso esnan ku tabatin no ta traha 24 ora i esakinan lo keda remplasá den kuadro di e trabounan ku ta tumando lugá. “Ta trabounan di konstrukshon ta hasiendo na skol di polis i a kibra un kabel. Pa por hasi sierto trabounan mester a hasi sierto ahustenan”, asina e bosero di Kuerpo Polisial Imro Zwewer a splika.

E ta bisa pues ku no ta bèrdat ku a kita kamara nan ku ta vigilá e área kaminda polisnan ta warda nan arma i tambe e ta splika ku lokual nan ta sosodiendo ta trabounan ku mester tuma lugá.