Dòkter di wowo ta duna pashènt fecha te 13 di desèmber

Apesar ku el a presentá ku wowo inflamá pa eksploshon di blas:

221
Dr Kelie: E la indiká na Vigilante pa tene kontakto awe pa nan hasi un investigashon pa sa kiko a bai robes, paso algu asina aki no mag di sosodé nunka mas.
WILLEMSTAD—Tin ora bo ta puntra bo mes unda humanidat di sierto spesialistanan ta. Anteriormente Vigilante a relatá kaso di un pashènt ku a haña fecha te desèmber di 2020 serka un speshalista. Ta asina ku a yega na konosementu di Vigilante un kaso masha insolito ku a sosodé ku un sra ku ta pashènt di dr di wowo kende ta dr Palm.

Vigilante  tabatin kontakto ku e pashènt aki i mester bisa ku e la keda masha desapuntá pa e trato risibí na ofisina di dr Palm. Loke a pasa ta ku e señora preparando lèsenar pa un kolega di dje ku a hasi aña a disidí na supla blas pa e parti di dekorashon. Den e suplamentu di blas aki esaki a rementá den su kara i lástima un wowo di dje. Na momentu ku esaki a sosodé e señora tabatin hasta e impreshon ku el a pèrdè bista di fuerte ku e impakto tabata riba su wowo. Promé kos ku el a hasi e mainta ei tabata di bai su dòkter di kas. Su dòkter di kas no a mira e embergadura di loke a pasa. El a djis bisa e señora keda kas sosegá i dun’é algu pa kalma doló. Komo ku e doló tabata persistente e señora a disidí na bai su dr di wowo ku ta Dr Palm. Grandi tabata su desepshon na momentu ku e la bai bali i keda konfrontá ku e partisipashon ku Dr Palm no por atendé.

For di momentu ku el a drenta e ofisina tur hende por a mira kon kòrá i hincha su wowo tabata. Apesar dje sirkunstansianan aki no a tene kuenta kuné. Tur loke nan a bis’e ta ku nan por dun’é un afsprak te 13 di desèmber, pues despues di mas ku 3 luna.  E señora sabiendo di kondishon di su wowo i doló ku e ta sinti a disidí na bai un otro dòkter di wowo. Den e kaso aki manera e asistente na bali a mira e kondishon di su wowo a disidí mesora pa wak kon por atendé kuné mas pronto ku ta posibel. E mester a  bai saku si a paga pa e servisio na e momentunan ei, pero e la duna di konosé na Vigilante si ta 1000 florin e mester a paga lo no tabata problema p’e. Estando serka e dòkter di wowo aki el a komprondé di dje ku su dòkter di kas a aktua hopi robes, debí ku e mester a mand’é mesora serka un spesialista. E dòkter di wowo aki a hasta bis’e ku por poko e eksploshon di blas por a afektá su pupil i ku si esaki a sosodé lo el a pèrdè su bista. Serka e dòkter di wowo e ta risibiendo un tratamentu, pero mester bisa ku no ta nada fásil p’e. E ta hopi desapuntá pa e forma ku el a keda trata pa Dr Palm, siendo ku e ta su pashènt.

Pregunta serka dje ta ku si loke a sosodé kuné a pasa ku un hende sin entrada kiko lo por tabata e konsekuensia pa su bista. Relashoná ku loke a pasa Vigilante a drenta den kontakto ku Inspektor di Salubridat dr Kelie kende a keda sorprendí pa loke el a tende. Komo ku e no tin masha detaye e kier a evitá di duna masha komentario, pero si a splika kiko por tabata e senarionan. Su punto ta si ku e señora mester a ser atendé na drechi pa evitá ku lo e por pèrdè wowo.  El a indiká na Vigilante pa tene kontakto kuné awe pa asina nan komo inspekshon di salubridat hasi un investigashon, paso algu asina aki no mag di sosodé nunka mas.