Mei mion pa mihó fasilidat di drumi pa grandinan di Richardushuis

340
 Momentu ku Minister di Desaroyo Sosial tabata firma e dokumentu di akuerdo.I tambe esnan ku a forma parti di e momentu spesial aki.
Willemstad- Kuido i sosten di grandinan ta tareanan núkleo di gobièrnu i ta forma un parti integral di e tareanan núkleo di e Ministerio di Desaroyo Sosial, Labor i Bienestar. Esfuerso di e ministerio ta pa perkurá pa un oferta adekuá, kalitativo, amplio i variá di kuido i sosten di grandinan.

No opstante e esfuerso aki ta sosedé hopi biaha ku hende grandi mester biba den sirkunstansianan vulnerabel i ku medionan limitá. Ku bista pa esaki i den kuadro di selebrashon di ‘Dia di Grandinan’ gobièrnu e aña aki komo muestra di gratitut na grandinan pa nan aporte na desaroyo di nos komunidat a buta un suma di kasi mei mion disponibel pa renobashon i repartishon di e sala di dormitorio di Richardushuis. Richardushuis ta un kas di kuido pa hende grandi ku ta kai bou di Fundashon Kuido pa Hende Grandi Birgen di Rosario. E renovashon i repartishon di e sala di dormitorio ta ofresé mihó akohida/lokashon i fasilidat di drumi na e hendenan grandi, lokual na su turno ta kontribuí na promoshon di e kalidat di bida di e hendenan grandi riba tereno físiko, mental i sosial. Minister di Desaroyo Sosial, Labor i Bienestar ing. H.F. Koeiman i presidente di e Fundashon pa Kuido di Hende Grandi Birgen di Rosario I. Rossen-Lucasius a firma e konvenio pa renobashon i repartishon di e sala di dormitorio di Richardushuis djabièrnè 27 sèptèmber 2019.