Promé Minister Rhuggenaath a hiba diferente reunion na Washington D.C.

194
WILLEMSTAD – Djaluna 30 di sèptèmber Promé Minister di Kòrsou Eugene Rhuggenaath tabata di bishita na Washington D.C. pa papia ku tokante petishon adishonal pa eksonerashon riba e sanshonnan ku Merka a imponé riba PDVSA.

Durante e reunion aki Promé Minister a elaborá riba e petishon ku a keda entregá djaweps 26 di sèptèmber na OFAC pa asina purba salbaguardiá e pagonan ku Refineria Isla tin ku kumpli kuné na entre otro instansia i kompanianan lokal ku a hasi trabou p’e. Sra. Gacki na su turno a apresiá e splikashon i informason adishonal ku a ser duná durante e kombersashon i a indiká ku nan lo analisá e petishon na un manera prudente i ku pronto lo informá di nan desishon.

Tambe Promé Minister a tene kombersashonnan ku embahador sr. Michael Kozak, ku ta e Acting Assistant Secretary for Western Hemisphere Affairs i tambe ku sra. Carrie Filipetti ku ta e Deputy Assistant Secretary i alabes Deputy Special Representative for Venezuela; ambos di State Department. Den tur dos di e enkuentronan aki Promé Minister a elaborá riba e situashon na Venezuela i e impakto riba Kòrsou. A papia tokante kon Merka, Kòrsou i otro paisnan lo por koperá ku otro riba e tema di migrantenan for di Venezuela. Promé Minister tambe tabatin un enkuentro ku sr. Marshall Billingslea, Assistant Secretary for Terrorist Financing di Treasury Department, kaminda banda di e tema di Venezuela a elaborá tambe riba e tópiko di ‘correspondent banking’.

Den tur kombersashon a bin kla dilanti ku Merka ta agradesido pa e bon relashon ku ta eksistí entre Merka i Kòrsou. Finalmente Promé Minister a reuní ku representantenan di Organisashon Internashonal di Migrantenan (IOM) i Komisario Mayó pa Refugiado di Nashonnan Uní (UNHCR) pa wak posibel áreanan kaminda e dos organisashonnan aki lo por yuda Kòrsou ku e retonan ku ta enkontrando ku e situashon di Venezuela.

Promé Minister por wak bèk riba un dia fruktífero i ta ta spera riba un resultado positivo di parti OFAC.