Nigel Robertha i Roly Bonevacia ta gran ousentenan di nos ekipo nashonal

465
Nigel Robertha.
WILLEMSTAD—E atakante Nigel Robertha i e mediokampista Roly Bonevacia, ta e gran ousentenan riba e lista di nos selekshon nashonal. Esaki tabata di spera, mirando ámbos su manera di komportá resientemente. Un ke otro, apesar ku e motibu real di nan ousensia no ta konosí.

Si por a tuma nota ku e hóben atakante Nigel Robertha a train den gran forma na Kòrsou pa wega kontra di Haiti i sorpresivamente tabatin dolónan riba fecha di wega, ku a pone ku e no por a hunga.

A splika di ta dolónan leve i ku lo e ta kla pa mira akshon na Haiti di 3 dia despues. Yegando Haiti e no a ni train i tampoko por a mira akshon djamars, pero durante di e fin di siman ku a sigui, apénas 4 dia despues e tabata den akshon den gran forma ku su ekipo, hungando 90 minüt i inkluso a anotá. Esaki a ripití tambe den e siman ku a sigui i awor, manera a premirá i inkluso wòrdu publiká, Nigel no ta parti di e lista di 23 hungadónan.

Miéntras ku Roly Bonevacia, despues di tabata primintí hopi sin tabata yega a logra yega pa weganan kontra Haiti, pero sigur no a demostrá e nivel ku tabata spera di dje. Un ke otro, unda ku inkluso e tabata komo suplente, kual lo por ta e motibu di su ousensia pa nos próksimo kompromiso.

Banda di e duo ariba menshoná, por a tuma nota tambe ku e defensanan Jurich Carolina di NAC i Roshon van Eijma di Roda JC, tampoko no ta ku nos ekipo nashonal e biaha aki, miéntras ku tambe un biaha mas por a nota ousensia di Gervane Kastaneer.

Miéntras ku e atakante di FC Groningen, Charlison Benschop, un biaha mas tambe ta ousente, unda Gino van Kessel ta di regreso, meskos ku Shermaine Martina, kende resientemente mester a regresá kas, despues di a biaha pa Kòrsou leshoná.