Huntington Ingalls ke pone beslag riba Venezuela via korte na Kòrsou

799
Duo: abogadonan di e kompania estado unidense Huntington Ingalls, Gonzales na man robes i Boersma na man drechi.
Punda—Kompanianan estado Unidense ta kuminsá bini direkshon Kòrsou i Boneiru pa kobra nan plaka pegá na Repúblika di Venezuela. Esaki ta un indikashon último tempu kual via di tratamentunan sivil den korte na Punda, diferente kompania estado unidense a purba nan suerte. Huntington Ingalls ta unu di nan. Ekspertonan finansiero ta kalkulá ku Venezuela i PSVSA tin mas di 191 bion na debe internashonal.

Huntington Ingalls, manera Vigilante a publiká na dos okashon ta buskando un suma di 128 mion dòler for di Ministerio di Defensa venezolano. Ta trata di un kontrakt firma for di 1997, pero ku nunka no a finalisá. Di un banda Venezuela ta kleim inkumplimentu i di otro banda Huntington Ingalls ta kleim ku ta gobièrnu Chavista a para e pagonan. Ta trata di un proyekto pa remodela dos barku di guera den fleta di marina venezolano. Huntington Ingalls a splika den korte na Punda djaluna último ku e barkunan tabata yen di asbèst i esaki a difikultá e trabounan hopi. E kompania a kleim kasi 41 mion dòler pa trabounan èkstra. Pero e problema no ta e trabounan, sino unda Huntington por haña un korte pa arbitra den e polémika. A trata na diferente pais, entre nan Brazil Estádos Unídos (Washington, Columbia)  i Mexico, pero niun no a wòrdu rekonosé pa Venezuela. Segun abogado mr Coffie, kende mester a trata e kaso via di telekonferensha den sala sivil na Aruba, Caracas ta e úniko suidat ku por pone e arbitrahe konforme e kontrakt firmá. Esaki segun e abogado pasobra ta trata di informashonnan sekreto riba barkunan di guera i Venezuela no tei trata esaki den niun otro korte. Unu dje abogadonan di Huntington Ingalls, mr. Gonzales a duna di konosé ku den e kaso aki no por ta papiando di barkunan di guera pasobra nan no tabata den servisio pasobra nan ta drechando. Segun e eksperto den lei sivil, bo por yama un barku di guera na momento e ta den operashon.

E tratamentu di djaluna último tabata un tratamentu den korte di apelashon unda e.o. e wes yu di Kòrsou mr. Camelia a sinta. Na Boneiru sentensha a kai den Korte di Promé Instansha unda  Huntington por tin akseso pa pone beslag, pero e kestion ta  bira, beslag riba ken i na unda. Tin indikashon ku e beslag lo por kai riba Repúblika Bolivariano di Venezuela mes, lokual ta bira no ehekutabel den práktika. Manera menshoná, internashonalmente ta kalkulá ku PDVSA i Venezuela den konhunto tin un total di 190 bion dòler na debe. 76 bion ta debenan no-finansiero okashoná pa desishon di nashonalisá kompanianan internashonal bou di régimen di Chavez (16 bion) i debenan na kréditornan (57 bion). 115 bion dòler ta debenan den bolsa finansiero for di kual interesnan retrasá riba pagonan, inkluso 36 bion riba obligashon via bono emití pa nan gobièrnu. Ademas PDVSA tambe tin 28 bion dòler retrasá den kanselashon di bono. Mayoria di e kréditornan aki ainda mester kuminsá tuma akshon kontra di Venezuela. Pa tal motibu e desishon di Korte di Apelashon den kaso di Huntington ta delikado, mirando e posibilidat pa Willemstad no bira e trampolin di apelashonnan faborabel pa kreditornan venezolano. Un posishon ku por impliká konsekuenshanan polítiko.