Apesar di a sufri un kaida basta fuerte den e entrenamentu liber di e Gran Premio di Thailand…. Marc Márquez lo ta kla pa lucha pa e titulo di MotoGP mañan

83
Momentu ku tabata transportá Marc Márquez pa e hospital di Buriram.
THAILAND – E motosiklista Marc Márquez, ayera durante e promé sekshon di entrenamentu liber bálido pa e Gran Premio di Thailand den MotoGP, a pasa sustu di su bida ora ku e ta sufri un kaida basta fuerte.

Tabata durante e promé sekshon di e entrenamentu liber ku Marc Márquez ta sufri un kaida aparatoso i asta mester a keda transportá pa hospital unda a realisá algun chekeo médiko pa kontrolá si tur kos ta oké i despues tabata kla pa partisipá den e di dos entrenamentu liber ku a tuma lugá den oranan di atardi riba e ‘Chang International Circuit’ na Buriram.

“Marc Márquez a keda transportá pa e hospital di Buriram pa un kòntròl mas profundo”, asina e  ekipo Honda Repsol a informá na prensa. “Despues di e kòntròlnan médiko realisá na hospital, e dòkternan a deklará Marc Márquez fet pa por kompetí den e Gran Premio di Thailand.

Apesar di tabatin algu di doló na su hep, lomba i pianan, e tabata kla pa partisipá na e di dos sekshon di entrenamentu liber i lo ta kla pa e kompetensia mes.” Manera nos a skibi anteriormente, Márquez lo por konkista su di seis titulo mundial di MotoGP mañan.

Pa e por logra esaki a mester logra konkista dos punto mas tantu ku su kompetidor mas serka ku ta e italiano Andrea Dovozioso.