Den final 400 meter di e mundial di atletismo na Doha…. E kolombiano Anthony Zambrano a gana medaya di plata

81
DOHA – E atleta kolombiano Anthony José Zambrano ku a logra avansá pa e gran final di 400 meter di e  kampionato mundial di Atletismo na Doha, ayera a logra konkista medaya di plata den e gran final.

E velosista nasé na Maicao di 21 aña di edat, pero kriá na Barranquilla, a optené e di dos lugá den e gran final registrando un tempu di 44.15 sekònde, mehorando asina e rèkòrt kolombiano un biaha mas den apénas dos dia di tempu.

Anthony Zambrano no tabata figurá entre e faboritonan pero ta sa di duna un tremendo prestashon biniendo di atras den e kareda final pa asina konkista e di dos lugá. Durante di e weganan Panamerikano ku a tuma lugá na Lima Perú e tabata un di e atletanan ku mas a sobresalí pa Colombia ganando oro den e kareda di 400 meter i ganando oro den e kareda di relevo di 400 meter tambe.

E kolombiano Anthony Zambrano

Di e forma aki e atleta kolombiano ta logra marka historia den e gran final di 400 meter konkistando e promé medaya pa Colombia den e kampionato mundial di atletismo ku ta tumando luga na Qatar.

Steven Gardiner(43.48) di Bahamas a gana e medaya di oro miéntras ku e merikano Fred Kerley(44.17) a optené e medaya di bròns.