E relashon no ta kanando bon…. Vettel lo ta bandonando Ferrari i e ekipo ya tin un supstituto

74
E relashon entre Sebastain Vettel i Ferrari ta bayendo di malu pa pio!
ITALIA – E relashon entre e piloto di Fórmula 1 Sebastian Vettel i e ekipo Ferrari no ta esun di mas mihó i ta algu ku kualke fanátiko di Fórmula 1 por konkluí, prinsipalmente si tuma na kuenta e último desaroyonan di e temporada aki i e kantidat di frikshon ku e kuater bia kampion mundial tabatin ku e hóben piloto Charles Leclerc.

Un situashon ku a eskala na su klímaks durante e último Gran Premio ku a tuma lugá na Rusia, na momentu ku e piloto aleman a ninga di kumpli ku e palabrashon hasí ku e ekipo  i su kompañero, unda ku e último aki si a kumpli ku e loke a keda palabrá promé ku e kareda di Sochi kuminsá.

Despues di e loke ku a tuma lugá, un biaha mas e palabranan di e asesor di Red Bull, Helmut Marko, ku ta hopi bon ku Vettel, no a duna e resultado deseá. “Vettel no tin un futuro den Ferrari”, apesar ku na 2017 e la alargá su akuerdo te ku 2020.

Si e separashon entre Ferrari i Vettel di bèrdat mester tuma lugá, e último aki lo por bolbe bèk e ekipo di Red Bull miéntras ku e aktual piloto di Renault, Daniel Ricciardo, lo ta esun ku probablemente lo remplas’é den e ekipo di Ferrari.