Dos piskadó ta sigui pèrdí riba laman despues ku boto a senk

Awe mainta Wardakosta Venezolano lo kontinuá ku buskeda

1285
E dos piskadónan ku a ta pèrdí for djabièrnè anochi.
Willemstad- Djabièrnè den oranan di anochi Wardakosta mester a risibí un yamada pa yudansa via di e kanal di emergensia pa un boto ku tabata konfrontá problema. Vigilante a kombersa ku bosero di Wardakosta Sra. Shalick Clement ku a splika ku tabata alrededor di 8’or di anochi ku a drenta e informashon ku e boto tabata yenando ku awa i ku esaki tabata senk.
Bosero di Wardakosta Shalick Clement.

Ta trata di dos piskadó ku a sali riba e boto Sangimar pa piska. Mesora ku a drenta e informashon na Wardakosta a dirigí e helikòpter ku ya tabata den laira pa e direkshon ei pa kuminsá ku e búskeda.  Durante di e búskeda a bin topa ku un frishidèr ku piskánan den dje i tambe algun palu ku tabata drif. E situashon di búskeda tabata poko difísil mirando ku ya nan tabata den awanan teritorial di Venezuela. Mesora a tuma kontakto ku Wardakosta di Venezuela pa asina duna un man den e búskeda mirando ku e frontera ta sera i esaki por trese konflikto entre Kòrsou i Venezuela. Te na e momentunan aki no a bin topa ku e piskadónan. Pa loke ta e kondishon di laman e djabièrnè ei e awa tabata trankil i ku ta duna indikashon ku ta trata di problema ku e boto a bin konfrontá i ku esaki a yena ku awa basta lihé. Awe den oranan di mainta Wardakosta di Venezuela lo kontinuá ku e búskeda.•