Den e goliada di 4-0 kontra Sevilla… E refri Mateu Lahoz a ekspulsa Araujo i Dembélé di Barcelona

62
E arbiro Antonio Mateu Lahoz.
BARCELONA – E árbitro prinsipal di e enkuentro di ayera entre e ekipo di Barcelona i e ekipo di Sevilla, Antonio Mateu Lahoz, a kombertí su mes den e protagonista prinsipal den e parti final di e enkuentro ku a tuma lugá den Camp Nou djadumingu.

Faltando apénas dos minüt pa e enkuentro finalisá, e árbitro Lahoz ta saka dos karchi kòrá dirèkt pa e hungadónan Ronald Araujo i Ousmane Dembélé. Tantu e hungadónan di Barca komo e fanátikonan presente a protesta kontra e akshon aki.

E sentral uruguayo a risibí kòrá pa un falta basta diskutí kontra di Chicharito, siendo e último defensa, miéntras ku den kaso di e franses Dembele (ku ya tabatin un hel) tabata pa motibu di su forma di protesta e ekspulshon di Araujo.

Sergio Busquets tambe a risibí hel serka Mateu Lahoz pa a reklamá. E enkuentro a finalisá ku skor di 4-0 na fabor di Barcelona ku golnan anotá pa, Suárez (27’) 1-0, Arturo Vidal (32’) 2-0, Dembélé (35’) 3-0 i Messi (78’) 4-0.