E uniko dos medayanan di Hulanda den e kampionato mundial di atletismo…. Hassan ta konkista su di dos medaya di oro na Doha

63
Sifan Hassan su meta awor ta pa konkista dos medaaya di oro na Tokyo 2020.
DOHA – E atleta hulandes Sifan Hassan a bolbe impreshoná ku su forma dominante di kore i tabata den e kareda final di 1500 meter, ku a tuma lugá djasabra último durante e kampionato mundial di Doha, ku e ta logra un viktoria impreshonante i demostrando su dominio total riba e distansia aki tambe.

Tabata e promé bia den historia di atletismo ku un atleta ta konkista medaya di oro riba 10 kilometer i den e mes un evento ta konkista medaya di oro riba 1500 meter. Nunka ántes esaki no a yega di sosodé durante di un kampionato mundial i tampoko durante weganan olímpiko.

E atleta hulandes oriundo di Etiopia a logra e viktoria den e final di 1500 meter registrando un tempu di 3:51.95, kedando na apénas 0.88 sekònde for di e rèkòrt mundial ku ta 3:50.07 i ku ta riba nòmber di su kompatriota di Etiopia Genzebe Dibaba. Esaki a nifiká tambe e úniko dos medayanan ku Hulanda a logra konkista durante di e kampionato mundial di Doha, finalisando na di 9 lugá riba e tabla di medaya.

E meta prinsipal di Sifan Hassan ta awor pa logra e mes un hazaña aki durante weganan olímpiko Tokyo 2020. Riba e pregunta kiko lo bai pasa awor pa loke ta su preparashon, e direktor tékniko di ‘Atletiekunie’, Ad Roskam, a informá ku e prioridat aktualmente ta pa buska un entrenadó nobo i a komentá ku e posibilidat pa Hassan bolbe bèk Papendaal pa asina kontinuá ku su preparashon tambe lo ta un opshon”.