Ekipo di relevo hulandes deskualifiká

228
E ekipo di relevo 4x100 meter di Hulanda.
QATAR—E ekipo di relevo den representashon di Hulanda den e mundial di atletismo na Doha Qatar, a keda deskualifiká djasabra último. Esaki despues di e gran final riba 4 x 100meter, unda ku nan a logra final komo e di 6 ekipo, entre e 8 ekiponan finalista.

Ta trata aki di ekipo, ku tabatin komo promé koredó e hulandes Joris van Gool, kende a wòrdu siguí pa 3 atleta Yu di Kòrsou, den personanan di Taymir Burnet komo e di 2 koredó. Hensley Paulina, kende ta e kampion hulandes riba 100 meter, tabata e di 3 koredó, miéntras ku Churandy Maritna, ku no mester di ningun introdukshon mas, a finalisá e kareda. Pues un ekipo di 4 atleta di kual 3 ta muchanan di nos.

E ekipo hulandes a logra tempu di 37.80 sekònde, durante di e kompetensia final djasabra último. Seguidamente e bin konstatá ku tabatin algu ku no a bai bon unda nan a wòrdu deskualifiká, pero ta kontentu si ku nan prestashon mirando atras riba un bon kareda. E tempu aki tambe lo por tabata un rekort nobo pa Hulanda, despues ku ya den e kareda klasifikatorio djabièrnè último, nan a mehorá e rèkòrt kaba markando tempu di 37.91 sekònde.

Tabata na momentu di e kambio di koredó entre Paulina i Burnet, ku e último aki, a tuma e palu pafó di e espasio pa hasi esaki.

Miéntras tantu tabata e ekipo di Merka ku a logra Oro ku tempu di 37.10 sigui pa Gran Britania ku a logra Plata ku tempu di 37.37 i Hapon a logra tempu di 37.43, kual tabata bon pa medaya di Bròns, pa loke ta e kareda di 4 x 100 meter den e kampionato mundial di atletismo.